बुटवल, २२ वैशाख । रुपन्देहीमा लक्ष्मी खत्रीको शंकास्पद मृत्यु भएको छ । दाइजो नल्याएको भन्दै करीव पाँच वर्षदेखि हिंसा सहेर बसेकी बुटवल उपमहानगरपालिका १४ बिनायकपुरकी २५ वर्षीया खत्रीको शुक्रबार बिहान घरको दोस्रो तलाको बरण्डामा झुण्डिएको अवस्थामा शव फेला परेको थियो ।

अघिल्लो दिन सासु हरिमाया खत्रीले कुटेर घाइते भएकी खत्री अस्पतालमा उपचार गराएर घर फर्किएकी थिइन्। सोही राती सासुबुहारीबीच झगडा भएको र हत्या गरेर झुण्ड्याएको माइती पक्षको आरोप रहेको प्रहरीले जनाएको छ ।

श्रीमान रोजगारीका लागि दुबई आउनेजाने गर्छन् । बिहे गरेको ६ महिनादेखि नै लक्ष्मीले सासुको दुर्व्यवहार भोगेको माइती पक्षले जनाएको छ ।

दाइजो कम ल्याएको भन्दै सासुले कुटपिट गर्दै आए पनि खत्रीले बाहिर नबताएको बुबा डोमबहादुर खत्रीले बताएका छन् । स्थानीयले सासुकै यातनाका कारण आत्महत्या गर्न बाध्य भएको भन्दै कारबाहीको माग गरेका छन्।