झापा,१ जेठ । झापा कारागार भद्रपुरमा सुरक्षार्थमा खटिएका एक प्रहरीले इटलियन पेस्तोलसहित १४ राउण्ड गोली भरिएको म्यागजिन हराएको घटना बाहिर आएको छ ।

झापा कारागारको नेतृत्व सम्हालेका प्रहरी नायव निरीक्षक नरेश आचार्य विदामा रहेका वेला कारागारबाट प्रहरीले बोक्ने हतियार हराएको हो ।

प्रहरी नायव निरीक्षक आचार्य घर विदा गएका बेला कारागारको सुरक्षाको जिम्मा प्रहरी सहायक निरीक्षक हिरण सिंहलाई दिइएको थियो । एक प्रहरीले अर्का प्रहरी जवान कुमार भोटेलाई हतियार बुझाएको रेकर्ड छ । तर, विहान पेस्तोलसहित १४ राउण्ड गोली भरिएको म्यागजिन नभेटिएपछि कारागारको सुरक्षार्थ खटिएका प्रहरीबाटै हतियार हराएको घटना सार्वजनिक भएको हो ।

कारागारको सुरक्षार्थ खटिएका सुरक्षाकर्मीबाटै हतियार हराएपछि प्रहरी कार्यालय झापाका प्रहरी नायव उपरीक्षक महेन्द्रकुमार श्रेष्ठको संयोजकत्वमा छानविन समिति बनेको छ । छानविन समितिले हराएको हतियारको विषयमा अनुसन्धान थालेको जनाइएको छ ।

यता ९ महिनाअघि झापा कारागार भित्रैबाट फरार भएका एक कैदीबन्दी अझै फेला परेको छैन । गौरादह नगरपालिका ८ स्थित जुरोपानी निवासी २४ वर्षीय उमेश माझी फरार भएको ९ महिना बितिसकेको छ । २०७१ साल असार ७ गतेदेखि जबर्जस्तीकरणी र कर्तव्य ज्यान मुद्दामा सजाय भुक्तान गरिरहेका माझी २०७५ साउन दिउँसै कारागारबाट पर्खाल नाघेर भागेका थिए । कारागारबाट कैदी फरार भएपछि प्रहरी सहायक निरीक्षकसहित ६ प्रहरीलाई प्रहरी कार्यालय झापाले निलम्बन गरेको छ ।