काठमाडौं, २१ जेठ । सोमवारदेखि सोलुखुम्बु प्रहरी चौकीमा नेत्रविक्रम चन्द ‘विप्लव’ नेतृत्वको नेकपाको समूहको आक्रमणको प्रयास असफल भएपछि देशभर सुरक्षा संयन्त्रलाई ‘हाई अलर्ट’ राखिएको छ । सुरक्षा सयन्त्रको वैठक बसेर प्रहरी प्रधान कार्यालय र सशस्त्र प्रहरी बलले नेत्रविक्रम चन्द ‘विप्लव’ समूहले आक्रमण गर्न सक्ने भन्दै ‘अलर्ट’ रहन मातहतका निकायलाई निर्देशन दिएको हो । भोजपुर र खोटाङको सिमानामा पर्ने मैयुमको धोत्रेमा प्रहरीसँगको मुठभेडमा विप्लव नेकपाका कार्यकर्ता तिर्थराज घिमिरेको ज्यान गएपछि विप्लव समूह आक्रमणमा उत्रिनसक्ने सूचना सुरक्षा निकायलाई प्राप्त भएको थियो ।

गत सातामात्रै प्रहरीले मौखिक रुपमा दिएको निर्देशनमा, एक्लै नहिँड्न, सादा पोशाकका प्रहरीलाई सतर्क रहन र पहाडी इलाकामा रहेका चौकीको सुरक्षामा ध्यान दिन भनिएको थियो । गृहमन्त्री रामबहादुर थापाले गत साता संसदमा विप्लव समूहले चार बटालियन जनसेनाको तयार पारेको खुलासा गरेका थिए ।

प्रहरीले विप्लवसहित नेता–कार्यकर्ता खोज्न ‘सर्च एण्ड अरेस्ट अपरेसन’ अन्तर्गत गाउ–गाउँमा प्रहरी परिचालन गरेको छ । सुरक्षा रिपोर्टअनुसार तराईका जिल्लाभन्दा पहाडी जिल्लामा रहेका प्रहरी चौकीलाई विप्लव समूहल निसानामा राखेको छ । यसअघि कालीकोटमा पनि विप्लव समूहले प्रहरीमाथि आक्रमणको प्रयास गरेको थियो । प्रतिबन्ध लागेपछि पार्टीको सांगठनिक संरचना बदलेको नेकपामा विप्लव सबैभन्दा शीर्ष तहमा छन् । महासचिवको हैसियतमा उनले नेतृत्व गरिरहँदा पार्टीले पाँच सदस्यीय स्थायी समिति बनाएको छ । सांगठनिक रुपमा देशलाई तीन भागमा विभाजन गरेको छ । यसमा पूर्वी कमाण्ड, मध्य कमाण्ड र पश्चिमी कमाण्ड छन् ।

पूर्वी कमाण्डको इन्चार्ज पोलिटब्यूरो सदस्य अनिल शर्मा ‘विरही’ हुन् । मध्य कमाण्ड इन्चार्जमा स्थायी समिति सदस्य हेमन्त प्रकाश ओली ‘सुर्दशन’ हुन् । उनी पक्राउ परेपछि खड्गप्रकाश विश्वकर्मा ‘प्रकाण्ड’लाई मध्यकमाण्डको जिम्मेवारी दिइएको छ । पहाडी जिल्लामा रहेका कतिपय प्रहरी चौकी सञ्चार सम्र्पकमा छैनन् । अत्यधुनिक हतियारको अभाव र भौगोलिक विकटका कारण प्रहरी चौकी र जनशक्ति नै भनेजति छैन् । नेपाल प्रहरी र सरकारी कर्मचारीमाथी आक्रमण गरेर केन्द्रलाई तर्साउने नीति विप्लव समूहले लिएको देखिन्छ ।

विप्लव समूहले सोमबार मात्रै सोलुखुम्बुमा प्रहरी चौकीमाथि आक्रमण गर्ने प्रयास गरेको भए पनि स्थानीयको सूचनाका कारण असफल भएको थियो । राति १२ बजे स्थानीयले हतियारसहित प्रहरी चौकीतर्फ गइरहेको विप्लव समूहलाई देखेपछि प्रहरीलाई सुरक्षित रहन खबर गरेका थिए । राति चौकी छाडेर भागेका प्रहरी बिहान ६ बजेमात्रै चौकीमा फर्किएको भए पनि गृह मन्त्रालयले भने अस्वीकार गरेको छ ।
आइतबार दिउँसो सोलुखुम्बुको महाकुलुङ गाउँपालिका–३ छेस्कामका स्थानीयले गाउँमा हतियारधारी समूह छिरेको सूचना जिल्लाका सुरक्षा अधिकारीलाई दिए । सूचना पाएलगत्तै प्रहरीको आशंका विप्लव समूहतिर तेर्सियो ।

प्रहरीले विप्लवतिरै शंका गर्नु पछाडि दुई कारण थिए, पहिलो–गाउँमा हतियारधारीको चहलपहल बढेको जानकारी आइरहेको थियो । त्यही आधारमा गस्ती पनि बढाइएको थियो । आइतबार राति चौकी छाडेर हिँडेका प्रहरी अधिकारीहरु विहान पुनः चौकीमा पुगे । त्यहाँ आक्रमणको कुनै निशाना थिएन । कागज पत्र र अन्य दस्तावेज पनि सकुशल थिए । जिल्लाका एक सुरक्षा अधिकारीका अनुसार त्यसरी गाउँ प्रवेश गरेका भनिएका हतियारधारी विप्लव समूहका कार्यकर्ता थिए/ थिएनन् भन्ने पुष्टि समेत भएको छैन । अहिले अनुसन्धानका लागि जिल्ला प्रहरी प्रमुख डीएसपी सालिकराम शर्मा आफैं घटनास्थल पुगेका छन् । प्रमुख जिल्ला अधिकारी नरेन्द्रकुमार रानाले भने बाहिर आए जस्तो घटना नभएको बताउँछन् ।

सरकारले विप्लव समूहलाई २८ फागुनमा प्रतिबन्ध लगाएको छ । १२ जेठमा काठमाडौंमा भएको श्रृङ्खलाबद्ध विस्फोटका घटना भयो । तर अहिलेसम्म विप्लव समूहले प्रहरी चौकीमा आक्रमण जस्ता घटना केही गरेको छैन । विप्लव समूहलाई लिएर गाउँमा खटिएका प्रहरीहरुमा भने त्रास छ । स्थानियबासीको भनाइलाई आधार मान्ने हो भने सोलुखुम्बुमा हतियारसहित छिरेको समूह कुन हो ? र सुरक्षामा खटिएको प्रहरी चौकिनै छाडेर भागेको भए किन भाग्नुप¥यो यसको खोजविन गर्न आवश्यक छ ।