काठमाडौं, २१  असार । कृषि, भूमि व्यवस्था तथा सहकारीमन्त्री पद्ममाकुमारी अर्यालले सहकारी संस्थालाई कृषि उत्पादनतर्फ जोड्नुपर्ने विचार व्यक्त गर्नुभएको छ । अन्तर्राष्ट्रिय सहकारी दिवसको अवसरमा आज ललितपुरमा आयोजित कार्यक्रममा उहाँले कृषिको आयात प्रतिस्थापन गर्न सहकारी मुख्य विकल्प बन्न सक्ने बताउनुभयो ।

मुलकभर झन्डै ३५ हजार सहकारी भएपनि कृषिमा सहकारी संस्थाको आकर्षण छैन । राज्यले कृषिलाई व्यावसायिक बनाउन अनुदान तथा सहुलियत कर्जाको व्यवस्था गरे पनि कृषिको आयात भने घटेको पाइँदैन । नेपालका सहारी संस्थासँग झण्डै रु सात खर्ब पूँजी बचत छ भने ६५ हजारले प्रत्यक्ष रोजगारी पाएका छन् ।

जुलाई ६ मा अन्तर्राष्ट्रिय सहकारी दिवस पर्छ । यस वर्ष उक्त दिवसको नारा ‘मर्यादित कामका लागि सहकारी’ भन्ने रहेको छ । प्रत्येक वर्ष नेपालमा सहकारी महासङ्घको आयोजनमा अन्तर्राष्ट्रिय सहकारी दिवस मनाउने चलन छ । आजकै दिन २५औँ संयुक्त राष्ट्रसङ्घ र २६औँ राष्ट्रिय सहकारी दिवस पनि पर्छ ।

आज ललितपुरमा तीनवटै संस्थाको स्थापना दिवसको अवसर पारेर यस वर्षको उत्कृष्ट सहकारी पुरस्कार २०७५ ललितपुरको बहुउद्देश्यीय सहकारी सङ्घलाई र उत्कृष्ट सहकारी व्यवसाय पुरस्कार क्रमशः प्रदेश १ बाट शुभलक्ष्मी सहकारी संस्था लि गौरादह–१ झापालाई, प्रदेश २ मा मनोकामना बहुउद्देश्यीय सहकारी संस्था लि हरिवन सर्लाहीलाई, प्रदेश ३ मा लालिगुराँस बहुउद्देश्यीय सहकारी संस्था लि ललितपुरलाई प्रदान गरिएको छ ।

त्यसैगरी, गण्डकी प्रदेशमा आदर्श सञ्चार सहकारी संस्था लि बागलुङ, प्रदेश ५ मा सामूहिक विकास बचत तथा ऋण सहकारी संस्था लि। रुपन्देही, कर्णाली प्रदेशमा साना किसान कृषि सहकारी संस्था लि सुर्खेत र सुदूरपश्चिम प्रदेशमा किसान बहुउद्देश्यीय सहकारी संस्था लि कैलालीलाई नगद रु २० हजारसहित सम्मान गरिएको छ ।

कार्यक्रममा राष्ट्रिय योजना आयोगका सदस्य डा दिलबहादुर गुरुङले सहकारी संस्थाले ऋण असुली र लगानी मात्र नगरी उत्पादन तथा सामाजिक दायित्वसमेत निर्वाह गर्नुपर्ने बताउनुभयो ।

संयुक्त राष्ट्रसङ्घीय विकास कार्यक्रम ९यूएनडिपी०का आवासीय प्रतिनिधि आयसानी मेडागानगोडा लेवले नेपालमा सहकारी संस्थालाई कृषि क्षेत्रमा जोड्न नसकेको बताउनुभयो । कार्यक्रममा अन्तर्राष्ट्रिय सहकारी महासङ्घ ९आइसिए० का सदस्य ओमदेवी मल्लले नेपालको स्वाधीनतामा सहकारी संस्थाको महत्वपूर्ण योग्दान रहेको बताउनुभयो ।

राष्ट्रिय सहकारी महासङ्घका अध्यक्ष केशव बडालको अध्यक्षतामा सम्पन्न सो दिवसमा पूर्वमन्त्री दीपकप्रकाश बाँस्कोटा, गणेश साहलगायतले नेपालको सहकारी आन्दोलनका बारेमा आ–आफ्ना धारणा राख्नुभएको थियो ।