काठमाडौँ, २७ असार । गत आवमा १९ जनाको सडक दुर्घटनाका कारण ज्यान गएपछि पोखरा – बागलुङ जिरो किलोमिटरको सडकको रुप यतिबेला फेरिएको छ । पोखरा महानगरपालिका वडा नं ५ को पहलमा राखिएको डिभाइडरलगायत पूर्वाधारको विकासले दुर्घटनालाई न्यूनीकरण गरेपछि स्थानीयवासी निकै खुशी छन् ।

सुरक्षित सडकको मापदण्डलाई ध्यान दिँदै रोड मेडियन ब्यारियर ९३३ सेन्टिमिटरको उचाइ निर्माणसँगै सौर्यबत्ती जडान र सडक चौपायाको उचित व्यवस्थापन गर्नाका साथै वडा ट्राफिक प्रहरी पोष्टमार्फत निगरानी बढाइएपछि दुर्घटना न्यूनीकरण भएको महानगरका प्रवक्ता एवं वडा नं ५ का वडाध्यक्ष धनबहादुर नेपालीले जानकारी दिनुभयो । नेपालीका अनुसार ६ लेनको आधुनिक सडकमा डिभाइडर नहुँदा चालकले जथाभावी तीव्र गतिमा सवारी हाँक्ने तथा ट्राफिक नियमको उल्लङ्घन र छाडा चौपायाका कारण दिनहुँजसो दुर्घटना हुँदा धेरैले ज्यान गुमाएका थिए ।

“सडकको स्तरोन्नती भयो तर चालकहरुको लापरवाहीले दुर्घटना डरलाग्दो बन्दै गयो । अहिले पाँच महिना यता डिभाइडरलगायत पूवर्वाधारले दुर्घटना कम भएको छ भने मानवीय क्षति हुने गरी दुर्घटना भएको छैन”, नेपालीले भन्नुभयो “डिभाइडरमा ट्राफिक कलर लगाउनुका साथै सडक दुर्घटना न्यूनीकरणका लागि आमा समूह र विद्यार्थीलाई ट्राफिक सचेतना कार्यक्रम सञ्चालन गर्दै आएका छौँ ।”

अत्यधिक दुर्घटनाका कारण मानवीय एवं भौतिक क्षति बढ्न गएपछि सडकलाई ज्यानमारा सडक नाम राखिएको थियो । अहिले सुरक्षित सडकका लागि सबैले पहल थालेपछि त्यो नाम हटेको छ ।“जिरो किलोमिटरदेखि विन्ध्यवासिनीसम्मको उक्त सडक झण्डै तीन किमीको छ । अहिले नौ सय मिटरमा डिभाइडर राखिएको छ ”, वडा सदस्य अञ्जु क्षेत्रीले भन्नुभयो “अहिले दिनहुँ हुने दुर्घटनाम कमी आएको छ ।” केन्द्रीय सडक परियोजनाको बहुवर्षीय योजनाअन्तर्गत रु ७८ लाखमा बोलपत्र आह्वान गरेर काम थालिएकामा चालु आवमा डिभाइडर राखिएको क्षेत्रीले जानकारी दिनुभयो । सडक छेउमा इलेक्ट्रोनिक पसल गर्दै आउनुभएका दीनबन्धु भुर्तेलले पनि डिभाइडरलगायत पूर्वाधार बनेपछि ठूलो र मानवीय क्षति हुने खालका दुर्घटना देख्नु नपरेको बताउनुभयो ।