दाङ, २८ असार । नियमितको बर्षाले शनिबार दाङको यातायात सेवा प्रभाबित भएको छ । तुलसीपुर—लमही सडकबीचमा पर्ने खोलाहरुमा पानीको बहाव बढेपछि शनिबार ठूला सवारी साधनहरु मात्रै छिटफुट रुपमा सञ्चालन भएका छन, भने साना सावारीका साधनहरु भने ठप्प छन् । बबई खोलामा शनिवार विहानै देखि कुनै पनि सवारी साधन आवतजावत गर्न नसकेको जिल्ला प्रहरी कार्यालय दाङका प्रहरी नायब उपरीक्षक बिनोदबिक्रम शाहले बताउनुभयो ।

उहाँका अनुसार दाङका अन्य खोलाहरुमा पनि ठूला सवारीका साधनहरु सञ्चालन भएपनि साना सवारीका साधनहरु सञ्चालन हुन सकेका छैनन् । त्यसले गर्दा यात्रुहरुलाई आवत जावतमा समस्या हुने गरेको छ । अहिले लमही–तुलसीपुर सडकखण्डमा ६ वटा पुल निर्माणाधीन अबस्थामा छन् । ति पुलहरुमा उचित डाईभर्सन नहुँदा बर्षादको समयमा यात्रुहरुलाई सास्ती हुने गरेको छ । शुक्रबार रातिदेखि दाङका खालाहरुमा पानीको बहाब बढेको प्रहरीले बताएको छ । नियमितको बर्षाले दाङको देउखुरी क्षेत्र जलमग्न भएको छ । देउखुरी स्थित दोलाईखोलामा पानीको वहाव बढेपछि राप्ती गाउँपालिकाको ५ लठ्ठहवा,पहरूवा,कालापानी जलमग्न भएको छ ।

त्यस्तै लमही नगरपालिका वडा नं. १ डोरही,सिंगइ,सोनपुर लगायतका गाउँ जलमग्न बनेका छन् । त्यसैगरी नियमित वर्षाले राप्ती गाउँपालिका १ शान्तिपुर चैतेका नेत्र खनालको पोल्ट्रीफर्मलाई गनाहा खोलाले बगाउँदा ५०० चल्ला र ५०० बोइलर कुखुरा बगाएको छ । खोलाले बगाउदाँ करिब साढे ४ लाख बराबरको क्षति भएको पीडित खनालले बताउनुभयो । त्यसैगरी गढवा गाउँपालिका ५ बोधिपुरमा झण्डै ५० बढी घर डुवान परेको गाउँपालिकाले जनाएको छ । यता बर्षायाममा हुन सक्ने क्षतिलाई बचाउन दाङमा साढे ७ सय तालिम प्राप्त सुरक्षाकर्मी तयारी अबस्थामा राखिएको जिल्ला विपद् व्यवस्थापन समितिले जनाएको छ । समिति दाङका अनुसार नेपाली सेना, नेपाल प्रहरी र शसस्त्र प्रहरी गरी करिब साढे ७ सय जनालाई तयारी अबस्थामा जोखिम क्षेत्रमा राखिएको छ । नेपाली सेना १ सय ८०, शसस्त्र प्रहरी ३५ जना र नेपाल प्रहरीका ५ सय २५ जनालाई बिषेश तालिम दिएर तयारी अबस्थामा स्रोत साधन सहित राखिएको प्रमुख जिल्ला अधिकारी गोबिन्दप्रसाद रिजालले बताउनुभयो ।

जिल्ला प्रशासन, जिल्ला प्रहरी कार्यालयका प्रमुखहरु नै विपद्को समयमा खट्ने गरी सबै प्रहरी चौकीका इन्चार्जलाई विपद् प्रतिकार्यका लागि खटाईएको उहाँले बताउनुभयो । बाढीको जोखिम क्षेत्रहरुमा तालिम प्राप्त सुरक्षाकर्मी, आबस्यक स्रोत साधन अन्तरगत लाईफ जकेट, डुंगा, रेनकोट, डोरी लगाएका सामाग्रीहरुका साथ तयारी अबस्थामा राखिएको र कुनै पनि जोखिमका सुचना दिन नागरिकहरुलाई प्रशासनले आग्रह गरेको छ । त्यसैगरी जिल्ला प्रशासन कार्यालयले जिल्लामा सर्तकता अपनाउन बाढि र पहिरो सम्भावित क्षेत्रका नागरिकलाई आग्रह गरेको छ । जिल्ला प्रशासन कार्यालय दाङले एक सुचना जारी गदै जिल्लाका सम्भावित क्षेत्रमा सर्तकता रहन आग्रह गरिएको छ । प्रमुख जिल्ला अधिकारी गोबिन्द रिजालले बाढि र पहिरोको उच्च जोखिम रहेका सम्भाबित क्षेत्रका बासिन्दालाई सतर्कता हुन आग्रह गदै सुरक्षित स्थानमा बस्न अपिल गर्नूभएको छ । त्यसैगरी तुलसीपुर उपमहानगरपालिका कार्यालयले पनि एक सुचना जारी गदै सतर्कता अपनाउन आग्रह गरेको छ । बाढीग्रस्त क्षेत्रमा रहेका नागरिकहरुको तत्काल उद्धारका लागि उपमहानगरपालिकाले सम्पूर्ण तयारी पुरा गरेको समेत उपमहानगरपालिकाले जनाएको छ । नगरप्रमुख घनश्याम पाण्डेले विज्ञप्ती जारी गर्दै शान्ती सुरक्षा, स्वास्थ्य लगायतका उद्धारको टोलि तयारी अवस्थामा रहेको उल्लेख गरेका छन् । उपमहानगरपालिकाले तत्काल उद्धारका लागि विभिन्न टोली परिचालन समेत गरेको छ ।