काठमाडौं, १२ असोज । नजिकिदो चाडपर्वमा उपभोक्तालाई लक्षित गरी सरकारले सञ्चालनमा ल्याएको सुपथ मुल्य पसलले सोचे अनुसारको व्यापार गर्न नसकेको स्विकार गरेको छ ।

उपभोक्ताले खासै महसुस हुने गरी सहुलियत नपाएको गुनासो गरेका छन् । सरकारले खाद्य वस्तुको मुल्य सबै पसलमा अनिवार्य गर्न नसक्दा उपभोक्ता अन्योलमा छन् ।

नजिकिदो चाडपर्वलाई लक्षित सरकारले भाद्र २३ गतेदेखि कार्तिक १७ गते सम्म सुपथ मुल्य पसल सञ्चालनमा ल्याएको छ । उद्योग, वाणिज्य तथा आपूर्ति मन्त्रालयको संयोजनमा साल्टट्रेडिङ कर्पाेरेसन, खाद्य व्यवस्था तथा व्यापार कम्पनी र दुग्ध विकास संस्थान (डीडीसी) ले सहुलियतमा सामान उपलव्ध गराएको छ । चाड पर्वमा उपभोक्तालाई सहजका लागि सरकारले ७३ स्थानमा सहुलियत पसल सञ्चालनमा ल्याएको छ । चाडपर्वमा कुनै पनि उपभोक्ता नठगिउनु भनेर सरकारले सहुलियत पसल सञ्चालन गरको हो । उपभोक्तालाई सस्तो मुल्यमा उपभोग्य सामाग्री उपलब्ध गराएपनि यस बर्ष अघिल्ला बर्षहरुमा जस्तो ब्यापार नभएको सुपथ मुल्य पसलले स्विकार गरेका छन् । उपभोक्ताले पनि सहुलियत महसुस गर्न नसकेको बताएका छन् । नुन, तेल, चिनीमा केहि रकम छुट भएतापनि कुनै कुनै सामान त साधारण पसलभन्दा महगो रहेको पनि गुनासो गरेका छन् ।

सरकारले विसं २०६६ देखि जनतालाई सहुलियत मूल्यमा उपभोग्य सामग्री उपलब्ध गराउन सहुलियत मूल्य पसल सञ्चालन गर्दै आएको छ । कतिपय उपभोक्ताले मूल्य कम भएको सामान आफूले चाहेजति लिन नपाएको पनि गुनासो छ । सहुलियत पसल भनेर धाउनै पर्ने अवस्था नभएको उपभोक्ता बताउछन् ।

दैनिक उपभोग्य वस्तुमा थोरै मात्रामा भएपनि सहुलियत प्रदान गर्न पसल सञ्चालनमा ल्याइएको सरकारको भनाइ छ । सरकारले आम उपभोक्तालाई राहात पुग्ने अपेक्षा गरेको छ । देशभर सरकारले मुल्य सूची कार्यान्वयन गर्न सके उपभोक्ताले वास्तविक मुल्य बुझ्न र राहात महसुस गर्न सक्नेछन् ।