काठमाडौं, २६ मंसिर । जनकपुरमा भएको १३ औँ दक्षिण एशियाली खेलकुद प्रतियोगिता साग को उद्घाटनका लागि ल्याइएको पट्कामा परेर एक बालकको ज्यान गएको छ । खेलकुद उद्घाटनका लागि आतिशबाजी गर्न ल्याइएको पट्का पड्काउँदा घाइते भएका बालकको उपचारका क्रममा निधन भएको हो । मंसिर १४ गते उद्घाटनमा आतिशबाजीका लागि पट्का पड्काइएका थिए । तर त्यती बेला नपड्किएको एक पट्का बालकले घरमा लिएका गएका थिए । १० वर्षीय बालक आलोक राउतले घरमा लगेर पट्का पड्काउने क्रममा घाइते भएका हुन् ।

जनकपुरधाम १३ स्थित कबर्ड हलनजिकै घर भएका राउतको उपचारका क्रममा आज निधन भएको हो । पट्का पड्केपछि घाइते भएका बालकको पेट पूर्णरूपले जलेको थियो। गम्भीर घाइते भएका बालक राउतलाई तत्कालै प्रादेशिक अस्पताल ल्याइएको थियो। तर, उपचार सम्भव नभएपछि धरानस्थित बिपी कोइराला मेमोरियल अस्पतालमा उपचार भइरहेको थियो।