काठमाडौं, २९ मंसिर  । नेपाल कम्युनिष्ट पार्टी (नेकपा) को स्थायी समितिको बैठक एक वर्षपछि आइतबार बस्दैछ । बैठक पार्टी कार्यालय धुम्बाराहीमा दिउँसो १ बजेका लागि बोलाइएको नेकपाले जनाएको छ ।

बैठकले एक वर्षको बीचमा सचिवालयले गरेको संगठनात्मक निर्णय अनुमोदन गर्ने, राजनीतिक प्रतिवेदनअनुसार विधानको प्रस्तावना संशोधन गर्ने र पार्टीले गरेको कामको ६ महिने कार्ययोजना पारित गर्ने तयारी छ । बैठकका एजेन्डा बारेमा प्रधानमन्त्री केपी शर्मा ओली र अध्यक्ष प्रचण्डले शनिबार दिउँसो प्रधानमन्त्रीनिवास बालुवाटारमा छलफल गर्नुभएको थियो । राजनीतिक तथा सांगठनिक प्रतिवेदन अध्यक्ष प्रचण्डले तयार गर्नुभएको छ । प्रतिवेदनमा राष्ट्रिय तथा अन्तर्राष्ट्रिय घटनाक्रम, वर्तमान राजनीतिक परिस्थिति, उपनिर्वाचनको समीक्षा, सरकारको काम, पार्टी संगठन परिचालनलगायतका समसामायिक विषय समेटिएको छ ।

स्थायी समिति बैठकअघि सचिवालयको बैठक बस्दैछ । तीन–तीन महिनामा स्थायी कमिटीको बैठक बस्नुपर्ने भए पनि विभिन्न कारण देखाउँदै एक वर्षदेखि नेकपाको स्थायी समिति बैठक बस्न सकेको थिएन ।