चितवन, ५ मंसिर ।
नेकपा एमालेका अध्यक्ष केपी शर्मा ओलीले देशमा शान्ति र स्थायित्वका लागि स्थिर सरकार आवश्वयक रहेको बताउनुभएको छ ।
चितवनको भरतपुरमा आयोजित बाम गठबन्धनको चुनावीसभालाई सम्बोधन गर्दै अध्यक्ष ओलीले बाम एकताले अस्थिर सरकार बन्ने नजिर समाप्त भएको दावी गर्नुभयो । उहांले बाम गठबन्धनले समृद्ध नेपाल, सुखी नेपाली बनाउने देशव्यापी अभियान सृजना गरेको बताउनुभयो । अध्यक्ष ओलीले कम्युनिष्ट सरकार बन्ने भयो भनेर नआत्तिने कांग्रेसलाई आग्रह समेत गर्नुभयो ।
अध्यक्ष ओलीले देशव्यापी रुपमा उम्मेद्वारलाई आक्रमण हुंदा पनि सरकार आंखा चिम्लेर बसेको आरोप लगाउनुभयो । चुनाव सार्ने योजनाका साथ चुनाव विरोधी गतिविधि भएको भन्दै उहांले चुनाव कुनै पनि हालतमा सम्पन्न हुने वताउनुभयो । अध्यक्ष ओलीले कामचलाउ सरकारले कर्मचारी सरुवा गरेर चुनाव विरोधी गतिविधि वढाएको भन्दै त्यसको प्रतिकार गर्ने चेतावनी दिनुभयो ।
यस्तै एमाले वरिष्ठ नेता माधवकुमार नेपालले नेपाली कांग्रेसलाई झुटको खेती नगर्न आग्रह गर्नुभयो । जनसभालाई सम्बोधन गर्दै नेता नेपालले कम्युनिष्ट विरुद्ध अफवाह फैलाएर कांग्रेसले झुटको खेती गरेको दावी गर्नुभयो । उहांले कम्युनिष्टको सरकार आए देशमा एकदलीय शासन आउंछ भनेर कांग्रेसले गलत प्रचार गर्दै हिंडेको बताउनुभयो । नेपालमा कम्युनिष्ट पार्टीको स्थापनादेखि नै देश र जनताको पक्षमा काम गरेको भन्दै नेता नेपालले जनताले आफ्नो पार्टी प्रष्ट छुट्याउने बताउनुभयो ।
यसैगरी एमालेका नेता तथा पूर्व अर्थमन्त्री सुरेन्द्र पाण्डेले चितवनलाई आर्थिक राजधानी बनाउने बताउनु भयो । उहांले प्रचुर सम्भावना भएको चितवनलाई बाम गठबन्धनको सरकारले आर्थिक राजधानी वनाउने दावी गर्नुभयो । चितवनमा भएको सभामा माओबादी अध्यक्ष प्रचण्ड सहभागी भएपनि सम्बोधन भने गर्नु भएन । पुत्र शोकमा रहनुभएका प्रचण्डकै आग्रहमा स्थगित गरिएको चुनावी सभा आज गरिएको थियो ।