काठमाडौं । अर्थमन्त्री डा. स्वर्णिम वाग्लेले सूचना प्रविधि (आईटी) क्षेत्रमा काम गरिरहेका युवा उद्यमीलाई निर्धक्क भएर स्वदेशमै लगानी बढाउन आग्रह गरेका छन्।

मंगलबार अर्थ मन्त्रालयमा आईटी क्षेत्रका युवा उद्यमीसँग छलफल गर्दै मन्त्री वाग्लेले सूचना प्रविधि क्षेत्र सरकारको विशेष प्राथमिकतामा रहेको बताए।

‘सूचना प्रविधि क्षेत्र छोटो समयमा ठूलो फड्को मार्न सकिने क्षेत्र हो। तपाईं युवा उद्यमीहरू लगानी बढाउनुहोस्, आफूलाई फैलाउनुहोस्। सरकार तपाईंहरूको साथमा छ। के–के गर्नुपर्ने हो भन्नुहोस्,’ उनले भने।

नेपालले विगतमा कृषिजन्य वस्तु उत्पादन तथा निर्यातका लागि लामो समय र ठूलो लगानी गरेको स्मरण गर्दै मन्त्री वाग्लेले सूचना प्रविधि क्षेत्रमा लगानीबाट तुलनात्मक रूपमा कम समयमा प्रतिफल प्राप्त गर्न सकिने बताए।

उनका अनुसार सरकारले चालु आर्थिक वर्षको बजेटमा सूचना प्रविधि क्षेत्रलाई विशेष प्राथमिकता दिएको छ। कृत्रिम बुद्धिमत्ता (एआई) विकासका लागि बजेट विनियोजन गर्नुका साथै आईटी क्षेत्रमा काम गर्ने युवा उद्यमीलाई प्रोत्साहन गर्ने नीति सरकारले लिएको उनले जानकारी दिए।

मन्त्री वाग्लेले सूचना प्रविधिको क्षेत्रमा थप लगानी र विस्तारका लागि आवश्यक वातावरण निर्माण गर्न सरकार प्रतिबद्ध रहेको बताए।

Originally published on abcnews.com.np.