रुकुम, ९ मंसिर । रुकुम पूर्वको सदरमुकाम रुकुमकोटबाट रुकुम पश्चिमको सदरमुकाम खलंगा आउँदै जीप हिजो बेलुकी रुकुम पश्चिमको मुसीकोट ६ कालीमाटीमा दुर्घटना हुँदा सात जनाको मृत्यु भएको छ ।  ग १ ज ४२६० नम्वरको जीप दुर्घटनामा रुकुमकोटका प्रहरी निरीक्षक नविन श्रेष्ठ, उनकी श्रीमती प्रहरी निरीक्षक अनिता प्रधान, भलिबल खेलका राष्ट्रिय रेफ्रि मुसीकोट–१ का जनक शाह, गाडी व्यवसायी सुदन श्रेष्ठ, शेरबहादुर श्रेष्ठ, शिक्षिका सुरेखा शाह श्रेष्ठ र यमुना मल्लको ज्यान गएको जिल्ला प्रहरी कार्यालय पश्चिम रुकुमले जनाएको छ । शेरबहादुर, सुदन र सुरेखा बुवा, छोरा र छोरी रहेको प्रहरीले जनाएको छ । घाइते भएका जिप चालक प्रेम थापासहित यात्रुहरु प्रेम केसी र टेकवहादुर खत्रीलाई थप उपचारका लागि नेपालगञ्ज पठाइएको छ । तीन दिनअघि मात्र विवाह गरेका प्रहरी निरीक्षकद्वय नविन र अनिता विवाह सकेर कार्यक्षेत्रमा फर्किने क्रममा जिप दुर्घटनामा पर्नुभएको हो ।