काठमाडौं,१५ मंसिर ।  निर्वाचनमा आचारसंहिता पालना भए नभएको अनुगमन गर्न निर्वाचन आयोगले आजदेखि सुक्ष्म अनुगमनकर्ता खटाएको छ ।
आयोगले आवश्यक ठानेका ठाउँमा अनुगमनकर्ता खटिनेछन् । ८८ जना उपसचिवस्तरका कर्मचारी सुक्ष्म अनुगमनमा खटिने आयोगले जनाएको छ । अनुगमनकर्ताले निर्वाचनमा आचारसंहिता पालना भए नभएको अनुगमन गर्नेछन् र पालना नभएको पाइए तुरुन्तै निर्वाचन आयोगलाई जानकारी गराउनेछन् । आचारसंहिता पालना नभएको पाइएमा ठाउँको ठाउँँ कारवाही गर्ने आयोगका प्रवक्ता नवराज ढकालले जानकारी दिए । पहिलो चरणको निर्वाचनमा दलका नेता कार्यकर्ता तथा उम्मेदवारले पनि आचारसंहिता पालना नगरेको गुनासो बढेपछि दोस्रो चरणको चुनावका लागि आयोगले अनुगमनकर्ता खटाएको हो ।

दोस्रो चरणको निर्वाचन आउँदो २१ गते ४५ जिल्लामा हुँदैछ । दोस्रो चरणमा प्रतिनिधिसभाका १ सय २८ र प्रदेशसभाका २ सय ५६ निर्वाचन क्षेत्रमा चुनाव हुँदैछ । यसैबीच निर्वाचन आयोगले दोस्रो चरणको चुनावको सुरक्षा व्यवस्थाको बारेमा आज सुरक्षा निकायसंग छलफल गर्दैछ ।

चारवटै सुरक्षा निकायका प्रमुख र सम्बन्धित मन्त्रालयका उच्च पदाधिकारीसंग दिउँसो १ बजे आयोगमा नै छलफल हुन लागेको हो । निर्वाचनका बेला देशका विभिन्न ठाउँमा बम विस्फोटको घटना बढेपछि सुरक्षाको बारेमा छलफल हुन लागेको हो । सरकारले सुरक्षा व्यवस्था कडा पारेको जनाएपनि ठाउँ ठाउँमा विस्फोटको घटना भैरहेको छ ।