काठमाडौँ, १३ साउन ।  प्रधानमन्त्री तथा पार्टी अध्यक्ष केपी शर्मा ओलीले आज मंगलबार ११ बजेका लागि तय भएको बैठक स्थगित गरेको सूचना जारी गरे पनि नेकपाका शीर्ष नेतासहित स्थायी समिति सदस्यहरु बालुवाटार पुग्ने क्रम जारी छ।

बालुवाटारमा रहेका एक नेताका अनुसार साढे ११ बजेसम्म १२ जना नेता बालुवाटार प्रवेश गरिसकेका छन्।

प्रधानमन्त्री ओली बिहान ११ बजेका लागि डाकिएको बैठक स्थगित गरेका थिए। तर प्रचण्ड–नेपाल पक्षका नेताहरू भने बैठक सुचारू हुनुपर्ने भन्दै बालुवाटार पुगेका छन्।

प्रचण्ड, बरिष्ठ नेताहरू माधवकुमार नेपाल, झलनाथ खनाल, प्रवक्ता नारायणकाजी श्रेष्ठ, महासचिव विष्णु पौडेलसहित अन्य स्थायी समिति सदस्यहरू बैठक हलमै छन्।

हामी १५–२० जान साथीहरू बैठकस्थल मै छौं। बैठक स्थगित भएको जानकारी छैन, प्रवक्ता श्रेष्ठले बताउनु भयो ,हामी बैठकको पर्खाइमा छौं। उहाँले  भन्नुभयो ,

मंगलबार ११ बजेका लागि तय भएको बैठक साढे १० बजे अर्को सूचना जारी नभएसम्मका लागि स्थगित भएको हो। प्रधानमन्त्री एवम् नेकपा अध्यक्ष केपी शर्मा ओलीसँग छलफलका लागि अर्का अध्यक्ष प्रचण्ड नआएपछि बैठक स्थगित भएको प्रधानमन्त्री निकट स्रोतको दाबी छ।

प्रचण्ड निकट स्रोतले भने दुई अध्यक्षबीचमा फोनमा कुराकानी भइरहेको तर एकतर्फी बैठक स्थगित गरिएको दाबी गरेको छ।

दुई अध्यक्षबीच निरन्तर कुराकानी भइरहेको थियो। हामी बालुवाटार जाने तयारीमै थियौं, प्रचण्ड निकट स्रोतले भन्यो, हामीलाई जानकारी नदिइकन बैठक अनिश्चितकालका लागि स्थगित गरिएको छ, हामीलाई आधिकारिक जानकारी दिइएको छैन।