अछाम , ३१ साउन । जिल्लाको साँफेबगर नगरपालिकामा एक हप्ताका लागि नगरबाट प्रबाह हुने सेवाहरु बन्द हुने भएका छन् । नगरपालिकामा कार्यरत कर्मचारीमा कोरोना भाईरसको संक्रमण देखिएपछि नगरपालिका बाट प्रवाह हुने सबै सार्वजनिक सेवाहरु बन्द रहने नगरपालिकाले जनाएको छ । नगरपालिकाले बुधबार एक प्रेस बिज्ञप्ती जारी गर्दै सेवा बन्द रहने जानकारी गराएको हो ।

नगरपालिकाले हालसम्म २ हजार ५ जनालई क्वारेण्टाईनमा राखेकोमा १८२६ जना घर फर्किसकेका र हाल १६९ जना मात्रै क्वारेण्टाईनमा रहेका नगर प्रमुख कुलबहादुर कुवँरद्धारा हस्ताक्षरित बिज्ञप्तीमा जनाईएको छ । नगरमा १२७१ जनाको स्वाब संकलन गरिएकोमा ११८९ जनाको रिपोर्ट नेगेटिभ र १६८ जनाको रिपोर्ट पोजेटिभ आएको तथ्यांक नगरले बिज्ञप्ती मार्फत सार्वजनिक गरेको छ ।

यस्तै १८३६ जनाको आरडिटी समेत गरिएको र त्यसम १५०९ जनाको नेगेटिभ तथा ३१७ जनाको पोजेटिभ रिपोर्ट प्राप्त भएको नगरले बिज्ञप्तिमा जनाएको छ । पिसिआर परिक्षणका स्वाब संकलन गरिएका ८० जनाको भने परिक्षण हुन बाँकी रहेको समेत नगरले जनाएको छ ।