काठमाडौं, २ भदौ । उपत्यकामा मात्रै कोरोना सङ्क्रमितको संख्या दुई हजार नाघेको छ । देशभर २७ हजार २ सय ४१ जनामा सङ्क्रमण पुष्टि भएकोमा उपत्यकामा मात्रै सङ्क्रमितको संख्या २ हजार १ सय ३५ पुगेको स्वास्थ्य तथा जनसंख्या मन्त्रालयले जनाएको छ । मन्त्रालयका अनुसार एक हजार ७ सय ५, लितपुरमा २ सय ८२ जना र भक्तपुरमा १ सय ४७ जना छन् ।

सोमवार मात्र उपत्यकामा काठमाडौंमा १ सय ३९, ललितपुरमा १५ र भक्तपुरका १४ जना गरी १ सय ६८ जना कोरोना सङ्क्रमित थपिएका थिए । उपत्यकामा अहिलेसम्म कोरोना सङ्क्रमणका कारण ११ जनाको ज्यान गएको छ । नेपालमा अहिलेसम्म २७ हजारभन्दा धेरैमा कोरोना पुष्टि भएको छ । जसमध्ये १७ हजार ४ सय ९५ जना उपचारपछि निको भएका छन् । ९ हजार ६ सय ३९ जना आइसोलेशनमा छन् भने १५ हजार १ सय ९८ जना क्वरेण्टीनमा छन् ।

जन स्वास्थ्य विज्ञहरुले काठमाडौ उपत्यकामा संक्रमितको संख्या दिनप्रतिदिन बढदै गएकोमा चिन्ता ब्यक्त गरेका छन् । मानव वस्ती बाक्लो र उपत्यकाका अस्पतालहरुमा समेत बेडको अभाव हुन थालेपछि अवस्था चिन्ताजनक भएको उनिहरु बताउछन् ।