विराटनगर, ८ भदौ । कोशी अस्पताल विराटनगर अन्तर्गत कोभिड–१९ उपचार केन्द्रमा थप एक जना कोरोनासंक्रमितको मृत्यु भएको छ । विराटनगर महानगरपालिका–८ का ६५ वर्षीय पुरुषको आइतबार राति ९ बजे मृत्यु भएको हो ।

उपचार केन्द्रका इन्चार्ज बरिष्ठ फिजिसियन डा. दीपक सिग्देलका अनुसार अस्पताल आईपुगेको एक घण्टामै उनको मृत्यु भएको बताउनुभयो । परिवारका सदस्यमा कोरोना संक्रमण पुष्टि भएपछि सम्पर्क पहिचानका आधारमा भदौ ४ गते मृतक पुरुषको स्वाब संकलन गरी परीक्षणका लागि कोशी अस्पतालको प्रयोगशालामा लगिएको थियो । रिपोर्ट आइतबार दिउँसो ३ बजे पोजेटिभ आएको थियो । दिउँसो रिपोर्ट पोजेटिभ आएका पुरुषलाई स्वास्थ्यमा समस्या थपिएपछि राति उपचारका लागि कोभिड अस्पताल लगिएको हो ।

मृतकका परिवारमा दुुई वर्षीया नाबालिकासहित अरु तीन जनामा यसअघि नै कोरोना संक्रमण पुष्टि भइसकेको छ । मृतककी श्रीमती, २५ वर्षीया बुहारी र दुई वर्षीया नातिनीमा संक्रमण पुष्टि भएको हो । तीनै जना अहिले घरमै रहेका छन् । योसँगै विराटनगरको कोभिड अस्पतालमा उपचारका क्रममा दुई जना संक्रमितको ज्यान गइसकेको छ ।

विराटनगरमा कोरोना संक्रमित एक महिलासहित १० जनाको मृत्यु भइसकेको छ । विराटनगरकै कोशी अस्पतालमा र बीपी कोइराला स्वास्थ्य विज्ञान प्रतिष्ठान धरानमा सात जनाको मृत्यु भएको थियो । एक जना संक्रमितको घरमै मृत्यु भएको हो ।आइतबार साँझ नै वीपी कोइराला स्वास्थ्य विज्ञान प्रतिष्ठानमा सकेत धरान–८ का ६७ वर्षीय पुरुषको निधन भएको थियो । वीपीमा पहिलो प्लाज्मा थेरापी गरिएका पुरुषको मृत्यु भएको प्रवक्ता डा.निदेश सापकोटाद्वारा जारी सुचनामा उल्लेख गरिएको छ ।