काठमाडौं, १२ भदौ । धरानस्थित बिपी कोइराला स्वास्थ्य विज्ञान प्रतिष्ठानमा थप दुई जना कोरोना संक्रमितको मृत्यु भएको छ।

झापाका ८३ वर्षीय पुरुष र मोरङका ५६ वर्षीय महिलाको उपचारका क्रममा मृत्यु भएकोे अस्पतालका प्रवक्ता डा निदेश सापकोटाले जानकारी दिनुभयो। झापाका पुरुष अत्याधिक खोकी, श्वास फेर्न समस्या र ज्वरो आएर झापाको बि एण्ड सि टिचिङ अस्पतालबाट रिफर भएका थिए। उनी भदौ ३ गते गते अस्पतालमा भर्ना भएका थिए। सोही दिन उनमा कोरोना पोजिटिभ देखिएको हो।

डा सापकोटाका अनुसार उनको उपचारका क्रममा आज बिहान ३ः४५ मा मृत्यु भएको हो। संक्रमित पुरुष मिर्गाला, उच्च रक्तचाप, मधुमेह अल्प रक्त कोशीकाका बिरामी पनि थिए।

त्यस्तै मोरङकी महिला अत्याधिक खोकी, श्वास फेर्न समस्या र ज्वरो आएको समस्या बढेपछि कोशी अस्पतालबाट रिफर भएकी थिइन्। उनी ९ गते अस्पताल भर्ना भएकी थिइन्।

उनको ९ गते कोरोना पोजिटिभ आएको थियो। उनको आज बिहान ३ः१४ मा मृत्यु भएको अस्पतालले जनाएको छ।