काठमाडौं, २२ असोज  गते । नेपाल कम्युनिष्ट पार्टी (नेकपा) का दुई अध्यक्ष केपी शर्मा ओली तथा पुष्पकमल दाहाल ‘प्रचण्ड’बीच अहिले प्रधानमन्त्रीको सरकारी निवास बालुवाटारमा बैठक जारी छ । सचिवालय बैठकको कार्यसूचीअनुसार गृहकार्य गर्न अध्यक्षद्वयबीच बैठक भइरहेको हो ।

गएको मंगलबार बसेको सचिवालय बैठकमा यसअघि असोज ६ गतेको बैठकले दिएको जिम्मेवारीअनुसार मन्त्रिपरिषद पुनर्गठन, संवैधानिक निकायमा पदपूर्ति तथा पार्टीको सांगठनिक एकतामा दुई अध्यक्षबीच गृहकार्य गर्न बाँकी रहेकाले त्यसै विषयमा केन्द्रित भएर छलफल भइरहेको बताइएको छ । अन्तरपार्टी निर्देशनमा दुबैजना अध्यक्षले असोज मसान्तभित्र पार्टीको सांगठनिक एकताको काम सम्पन्न हुने प्रतिवद्धता जनाइसक्नु भएको छ ।

अध्यक्ष प्रचण्डका प्रेस सल्लाहकार विष्णु सापकोटाकाअनुसार मध्यान्ह १२ बजेदेखि दुई अध्यक्षबीच बालुवाटारमा बैठक जारी छ । असोज ६ गते बसेको सचिवालय बैठकले १० दिनको समय दिएर सहमतिको खाका बनाउने जिम्मेवारी दुई अध्यक्षलाई दिएको थियो । सचिवालय बैठकले दिएको १० दिनको समय घर्किसकेकाले जिम्मेवारीअनुसार सहमतिको आधार बनाउने चटारो दुई अध्यक्षलाई छ ।