काठमाडौं, २२ असोज । भारतको आर्थिक सहयोगमा निर्माण गरिएको कैलाली जिल्लाको टीकापुरस्थित ‘श्री सरस्वती माध्यमिक विद्यालय’को नवनिर्मित भवनको उद्घाटन गरिएको छ ।

विहीबार भारत सरकारको ३.३ करोड करोड आर्थिक सहयोगमा निर्माण गरिएको उक्त भवनको काठमाडौंस्थित भारतीय राजदूतावास, जिल्ला समन्वय समिति तथा विद्यालय व्यवस्थापन समितिका प्रतिनिधि र स्थानीय प्रतिनिधिहरुले संयुक्त रुपमा उद्घाटन गर्नु भएको हो ।
‘नेपाल–भारत विकास सहकार्य’ कार्यक्रम अन्तर्गत भारत सरकारको आर्थिक अनुदान सहयोगमा ११ वटा कक्षा कोठा, पुस्तकालय, विज्ञान प्रयोगशाला, प्रशासनिक कक्ष, सभा कक्ष र सरसफाइ सुविधासहितको उक्त दुई तले विद्यालय भवनको निर्माण गरिएको हो ।
सुदूर पश्चिममा २३ र कैलालीमा ६ वटा गरी भारतले हालसम्म नेपालमा ४२३ वटा उच्च प्रभाव सामुदायिक विकास परियोजना सम्पन्न गरिसकेको जनाएको छ ।धनगढीस्थित क्षेत्रीय प्रहरी माध्यमिक विद्यालयमा बहुउद्देश्यीय हल, छात्रहरुका लागि छात्रावास तथा शिक्षकहरुका लागि आवासगृहको निर्माणका लागि अर्को एउटा परियोजना निर्माणाधीन अवस्थामा रहेको पनि जनाइएको छ ।