• प्रमोद भट्टराई ‘प्रतीक’

हामी पिँजडाको सुगा
कैद छौं खोर भित्र
घरमुली बाहिरै बस्छन्
खै के के गर्छन्

कहिले खलो सोहोर्छन्
कहिले घान हाल्छन्
कहिले भकारी भर्छन्
हामीलाई के थाहा?
हामी त पिँजडा भित्रको
सुगा पो त!

उनिहरुले नै रटाएको
जिन्दावाद र मुर्दावाद
हाम्रो लागि त शिर्फ
‘गोपिकृष्ण कहो!’
जानेको भाषा त्यही हो
त्यही दोहोर्याई रहन्छौं

सबैलाई सुनाइ रहन्छौँ
उनको लागि भने
त्यहीनै रहेछ सौन्दर्यता
अनि हाम्रो लागि भने
त्यहीनै बनिदियो कुरुपता!

घरिघरि जिस्क्याउँछन्
घरिघरि बिच्क्याउँछन्
अलिक चर्को बोल्यो भने
कहिले थर्काउँछन्
कहिले डण्डा तेर्स्याउँछन्
कहिले भोकाउछौँ
दाबिलो लागेको पेटले
निदाउन बल गर्नुपर्छ

कहिले रोगाउछौँ
अनि प्राण जाने घडी
कहिले आउला कुर्नुपर्छ
अन्ततः पिँजडा भित्र नै
पटक पटक मर्नुपर्छ
छी कति सार्हो अधमरो भएछौँ
पिँजडा भित्रको सुगा पो रहेछौँ।