रौतहट, १८ कार्तिक । जिल्ला प्रहरी कार्यालय रौतहटका प्रहरी उपरिक्षक सिद्धिबिक्रम साहलाई कोरोना संक्रमण भएको छ । कोभिड १९ संग मिल्दोजुल्दो लक्षण देखिएपछि पिसिआर परीक्षण गर्दा कोरोना रिपोर्ट पोजेटिभ देखिएको हो । जिल्ला प्रहरी कार्यालय रौतहटका प्रहरी प्रवक्ता डिएसपी भरत श्रेष्ठका अनुसार प्रहरी उपरिक्षक साहलाई रुघाखोकीसँगै ज्वरो देखिएको थियो । शुरुमा रुघाखोकी र त्यसपछि ज्वरो देखिएको तर हाल भने ज्वरो ठिक भएको उहाँले बताउनुभयो ।

पिसिआर परीक्षण गर्दा कोरोना रिपोर्ट पोजेटिभ आएसंगै साह सेल्फ आईसोलेसनमा बस्नुभएको उहाँले जानकारी दिनुभयो । पछिल्लो समय रौतहटमा कोरोना संक्रमणको दर बढ्दै गएको छ । एक सातामा १ सय ८९ जनाको स्वाब परीक्षण गरिएकोमा १ सय जनामा कोभिड १९ संक्रमण पुष्टि भएको जिल्ला अस्पताल गौरले जनाएको छ ।

बन्दाबन्दी खुलेपछि रौतहटमा सार्वजनिक यातायात र विद्यालय पनि खुलेका छन् । बजार, कार्यालय, व्यापार पहिलेकै अवस्थामा झैं सञ्चालनमा आएका छन् तर सुरक्षाको उपाय भने शून्य छ । जिल्लामा स्थानीयवासीहरुले मास्क लगाउने र भौतिक दुरी तथा स्वास्थ्य सचेतनामा ध्यान दिन छाडेका छन् । बजारहरुमा बढी भिडभाड हुनु र व्यक्तिगत दुरी कायम नहुनुले कोरोनाको जोखिम झनै बढेको चिकित्सकहरु बताउँछन्। पछिल्लो समय स्थानीयसँगै जिल्लाका सुरक्षा अधिकारीहरु, जनप्रतिनिधि र कार्यालयका कर्मचारीहरु संक्रमित हुने क्रम बढेको छ ।