पोखरा, ११ पुस ।  नेपाल खेलकुद पत्रकार मञ्चले हरेक वर्ष ‘पल्सर स्पोर्टस अवार्ड आयोजना गर्दै आएको छ । यस वर्ष पनि उक्त कार्यक्रमलाई निरन्तरता दिएसँगै ‘पल्सर स्पोर्टस अवार्ड २०७६’ अन्तर्गत पिपल्स च्वाईस विधा तर्फ राष्ट्रिय महिला भलिबल टोलीकी कप्तान अरुणा शाही पनि मनोनयमा पर्नुभएको छ ।

उहासँगै उक्त विधामा स्वीमिङ्बाट गौरिका सिंह, फुटबलबाट साबित्री भण्डारी, बास्केटबालबाट सदिना श्रेष्ठ र कराँतेबाट मन्डेकाजी श्रेष्ठ मनोनयमा परेका छन् । उक्त अवार्डको घोषणा भने आगामी पुष २८ गते हुनेछ । भोटिङको आधारमा घोषणा उक्त अवार्डको उपाधि राष्ट्रिय माहिला भलिबलकी कप्तान अरुणा शाहीलाई जिताउनका लागि पोखरेलीहरु समिति नै गठन गरी अभियानमै लागि परेका छन् । पश्चिमाञ्चल क्षेत्रीय भलिबल संघका अध्यक्ष समेत रहेका छ्याम बहादुर थापाले अरुणा शाही जिताउ अभियान अन्तर्गत आर्थिक संकलन समिति नै गठन गरि अघि बढेको बताउनुभयो ।

उहाले गण्डकी प्रदेशको मात्रै नभई सिङ्गो नेपालकै भलिबलकी नक्षेत्र अरुणालाई जिताउन सबैलाई अपिल गर्नुभयो । उहाले भलिबल खेलका उदीयमान खेलाडीको प्रेरणा बन्ने सक्ने भएकाले अरुणालाई जिताउनपर्ने थापाको भनाई छ । थापाको आफ्नै संयोजकत्वमा ५ सदस्यीय आर्थिक संकलन समिति गठन गरेसँगै आज पहिलो दिन नै ३ लाख ८२ हजार ६ सय ५१ रुपैया संकलन भएको छ । समितिले शाहीलाई जिताउनका लागि बैदेशिक रोजगारका लागि अन्य मुलुकमा रहेको नेपालीहरु समक्ष समेत सहयोगको अपिल गर्ने योजना बनाएको छ ।

स्थायी घर म्याग्दी भई हाल पोखरा बस्नुहुने भलिबल क्षेत्रको लोकप्रिय नाम अरुणाले पाँचौ, छैटौ, सातौ र आठौ राष्ट्रिय खेलकुद प्रतियोगितामा पोखरा देखी खेलीसक्नु भएको छ । त्यस्तै उनले १२ औं दक्षिण एसियाली खेलकुद प्रतियोगितामा नेपालको तर्फबाट कास्य पदक दिलाउनु भएको छ । गत वर्ष सम्पन्न १३ औं दक्षिण एसियाली खेलकुद प्रतियोगितामा उहाकै कप्तानीमा नेपाललाई रजत पदक दिलाउनु भएको थियो भने बङ्गलादेशमा सम्पन्न सेन्ट्रल जोन प्रतियोगितामा नेपाललाई स्वर्ण पदक दिलाउनु भयो । पछिल्लो समय लोकप्रिय अरुणाले भलिबलमा प्रवेश गरेको १४ वर्ष भैसकेको स्मरण गर्दै अझै पनि आम नेपालीको साथ र सहयोगको खाँचो रहेको बताउनुभयो । विगत केही वर्ष यता राष्ट्रिय महिला भलिबलको कप्तानी सम्हाल्दै आउनुभएकी पोखरेली अरुणा शाही ‘पल्सर स्पोर्टस अवार्ड २०७६’ अन्तर्गत पिपल्स च्वाईस विधा तर्फ मनोनयमा पर्नुभएको छ ।