बिर्तामोड, १८ पुस । नेकपा नेता योगेश भट्टराईले प्रधानमन्त्री केपी ओलीको राजनीतिक जीवन खतरामा परेको बताउनुभयो । प्रचण्ड नेपाल पक्षीय नेकपा झापा जिल्ला कमिटीले शनिबार बिर्तामोडमा गरेको विरोध सभालाई सम्बोधन गर्दै नेता भट्टराईले ओलीको राजनीतिक जीवन रक्षाका लागि पनि आफूहरु सडक संघर्षमा उत्रिनु परेको बताउनुभयो । उहाले ओलीले आफ्नो राजनीतिक जीवन, पार्टी र मुलुकलाई ठूलो दुर्घटनामा पारेको टिप्पणी गर्नुभयो । ‘हाम्रो संघर्ष ओलीको अन्त्यको लागि होइन ओलीको राजनीतिक जीवन रक्षाको लागि हो’ उहाले भन्नुभयो , ‘कम्युनिष्ट पार्टीको कार्यकर्ता तथा पार्टी र मुलुक निर्माणका लागि लामो समय सँगै हिँडेकाले पनि उहाँको जीवन रक्षा गर्नुपर्ने हाम्रो जिम्मेवारी हो ।’ नेता भट्टराईले क्याप्टेन (केपी ओली) ले गलत दिशामा जहाज उडाएकोले पार्टी र मुलुक दुर्घटना तर्फ मोडिएको बताउनुभयो । ‘तर, हामीसँग अर्का क्याप्टेन (प्रचण्ड) पनि छन् । त्यसैले जहाज दुर्घटनामा पर्दैनन्’ उहाले भन्नुभयो ‘अब जहाजलाई गन्तव्यमा पुर्‍याउन केही समय लाग्ला । तर, हामी सुरक्षित अवरण हुन्छौं ।’ उहाले ओली अब पार्टी र मुलुकको सबै जिम्मेवारीबाट अयोग्य प्रमाणित भएको आरोप समेत लगाउनुभयो । उहाले दल सम्बन्धि ऐनअनुसार नै नेकपा पार्टी, हसिया–हतौडा अंकित झण्डा र चुनाव चिन्ह सूर्य आफूहरुको हुने दाबी गर्नुभयो । नेता भट्टराईले कानुनी राज्यमा केपी ओलीले गरेका कुनै ‘सेटिङ’ काम नलाग्ने बताउनुभयो । नेता भट्टराईले भने,‘तपाईंहरु ढुक्क रहनुस् । प्रधानमन्त्री केपी ओलीले निर्वाचन आयोग, अदालत सबैतिर सेटिङ गरेका छन् भन्ने कुरा ‘हावा’ हो । कानुनी राज्यमा सबै काम कानुन अनुसार हुन्छ । कुनै सेटिङ–फेटिङले काम गर्दैन ।’