ललितपुर, १९ पुस । ललितपुरको ग्वार्कोस्थित एक गेस्ट हाउसमा २७ वर्षीया महिला सामूहिक रुपमा बलात्कृत भएकी छन् । २७ वर्षीया महिलामाथि बलात्कार गरेको भन्दै प्रहरीले ग्वार्कोस्थित लुम्बिनी गेस्ट हाउसबाट २ जना पुरुषलाई पक्राउ गरेको छ । पक्राउ पर्नेमा काभ्रेको बेथानचोक गाउँपालिका घर भएका ४३ वर्षीय अर्जुन प्रसाद तिम्लसिना लगायत २ जना छन् । प्रहरीका अनुसार शुक्रबार दिउँसो २ जना पुरुषले ग्वार्को बस्दै आएकी महिलालाई ललाई फकाई प्रलोभनमा पारी गेस्ट हाउसमा लगेर बलात्कार गरेका थिए । पीडित महिलाले आफू २ जना पुरुषबाट बलात्कृत भएको सूचना दिएपछि खटिएको प्रहरीले उनीहरुलाई गेस्ट हाउसकै कोठाबाट पक्राउ गरेको हो । पक्राउ परेका दुवै जनाविरुद्ध जवर्जस्ती करणी सम्बन्धी कसुरअन्तर्गत कारबाही प्रक्रिया अगाडि बढाइएको महानगरीय प्रहरी परिसर ललितपुरले जानकारी दिएको छ ।