काठमाडौं, ३० माघ । विभागीय टिम एपीएफ क्लब पोखरामा जारी टाइगर कप आमन्त्रित राष्ट्रिय क्लब भलिबल च्याम्पियनसिपको महिलातर्फ फाइनलमा प्रवेश गरेको छ । पोखरा रंगशालामा आज भएको खेलमा होङग्वान्जी न्यु डाईमण्ड स्पोर्ट्स क्लबलाई ३–० को सोझो सेटमा पराजित गर्दै एपीएफ फाइनलमा प्रवेश गरेको हो । फाइनल पुग्ने क्रममा एपीएफले न्यु डाईमण्डलाई २५–२१, २५–२१ र २५–२३ को सेटमा पराजित ग¥यो । अब एपीएफले फाइनलमा नेपाल पुलिस क्लबस“ग खेल्नेछ । पुलिस यस अघि नै फाइनल प्रवेश गरिसकेको छ । न्यु डाईमण्ड भने प्रतियोगिताबाट बाहिरिएको छ ।

पुरुषतर्फको फाइनलमा त्रिभुवन आर्मी क्लब र गण्डकी प्रदेशबीच खेल हुनेछ । आजै भएको खेलमा नेपाल पुलिस क्लबलाई ३–० को सेटमा पराजित गर्दै आर्मी फाइनलमा प्रवेश गरेको हो । आर्मीले पुलिसमाथि २६–२४, २५–२२ र २५–१४ को सेटमा जित निकालेको थियो । गण्डकीले एपीएफलाई हराएर फाइनलमा स्थान पक्का गरेको हो । गण्डकीले एपीएफलाई २५–२१, २९–२७ र २५–१५ ले पराजित गरेको थियो । प्रतियोगिताको फाइनल खेल भोलि हुनेछ । टाइगर ग्रुप अफ पोखराले आयोजना गरेको प्रतियोगिताको विजेता महिला तथा पुरुष टिमले समान १ लाख ५० हजार पाउनेछन् । यस्तै उपविजेताले ७५ हजार तथा तेस्रो हुनेले नगद ३५ हजारका साथमा मेडल, ट्रफी र प्रमाण पत्र प्राप्त गर्नेछन् । सान्त्वना पुरस्कार १५ हजार राखिएको छ ।