काठमाडौँ, ४ बैशाख । काठमाडौंमा उपत्यकामा तीव्र गतिको हावाहुरीसहित वर्षा भइरहेको छ । जल तथा मौसम पूर्वानुमान महाशाखाले पश्चिमी र स्थानीय वायुको प्रभावले काठमाडौंमा हावाहुरी चलेको जानकारी दिएको छ । महाशाखाकी मौसमविद् विभूति पोखरेलले कम्तीमा एक घन्टा तीव्र गतिको हावा उपत्यकामा चल्ने बताउनुभयो । उहाँले भन्नुभयो ,पश्चिमी र स्थानीय वायुको प्रभावले उपत्यकामा हावाहुरी चलिरहेको छ । यो कम्तीमा १ घन्टा बस्ने सम्भावना छ । विस्तारै पूर्वतिर सर्दैछ । उनले आवश्यक सतर्कता अपनाउन अनुरोधसमेत गर्नुभएको छ । उपत्यकासहितका पहाडी भू–भागहरुमा वर्षाको सम्भावना पनि रहेको महाशाखाले जनाएको छ । शनिबार केही स्थानहरुमा असिना पानी पनि पर्ने उहाँले बताउनुभयो । आइतबार पनि हावाहुरीको सम्भावना रहेको महाशाखाले जनाएको छ । प्रि–मनसुनको समय भएकाले हावा त चलिरहन्छ, मौसमविद् पोखरेलले भन्नुभयो , शनिबारको तुलानामा आइतबार हावाको गति केही कम हुन्छ । सोमबारदेखि अर्को प्रणाली आउन सक्ने पनि सम्भावना छ ।