काठमाडौ, ११ बैशाख । प्रधानमन्त्री केपी शर्मा ओलीले कोरोनाको बढ्दो जोखिमबारे  सरोकारवाला पक्षहरुसँग शनिवार छलफल गर्नुभएको छ  । छलफलमा कोभिड–१९ संकट व्यवस्थापन केन्द्र (सीसीएमसी) को निर्देशक समितिमा आवद्ध उपप्रधानमन्त्री ईश्वर पोखरेलसहित ८ मन्त्री, १२ जना सचिव, सुरक्षा अंगका प्रमुखहरु र अन्य केही कर्मचारीको संलग्नतामा रहेको थियो । दिनदिनै संक्रमितको संख्या बढ्दै गएको अवस्थामा कस्ता रणनीति अपनाउँदा उपयुक्त हुन्छ भन्ने विषयमा प्रधानमन्त्रीलाई सीसीएमसीले ब्रिफिङ गरेको हो ।

संक्रमण नियन्त्रणका लागि तत्काल लकडाउन गर्ने वा नगर्ने भन्ने निर्णय गर्ने विषयमा प्रधानमन्त्रीले अवस्था हेरेर निर्णय गर्न सक्ने अवस्था छ ।

स्वास्थ्य मन्त्रालयले भने जोखिम कम नभएकाले लकडाउनसम्म गर्नुपर्ने सीसीएमसीलाई प्रस्ताव गरेको छ । सरकारले अहिलेको अवस्थामा लकडाउन गर्न सकिने अवस्था नभएको जनाएको छ । सीसीएमसीको ब्रिफिङपछि प्रधानमन्त्रीले कोरोना नियन्त्रणका लागि कस्तो कदम चाल्न सक्छन भन्ने विषयमा सबैको चासोको विषय बनेको छ ।

बैठकमा सरकारले बैशाख ६ गते जारी गरेको आदेश कतैबाट पनि पालना नभएको बारे चर्चा भएको थियो । सरकारी आदेश र निर्णयको कार्यान्वयन नहुँदा जोखिम बढ्ने भन्दै विभिन्न विकल्पहरुका बारेमा छलफल भएको थियो ।

यातायातमा जोरबिजोर प्रणाली लागू गर्ने र कार्यकालमा आधा कर्मचारीमात्र राख्ने प्रावधानमा जानुपर्ने हुन सक्ने सरकारी कर्मचारीहरुले बैठकमा प्रधानमन्त्री समक्ष सुझाव राखेको बताइएको छ ।