काठमाडौं, ३१ वैशाख । प्रधानमन्त्री एवम् नेकपा अध्यक्ष केपी शर्म ओली र वरिष्ठ नेता माधवकुमार नेपालबिच आज पनि भेट भएको छ। सिंहदरबारस्थित प्रधानमन्त्री तथा मन्त्रिपरिषदको कार्यालयमा सुरु भएको भेटमा दोस्रो तहका नेताहरु समेत सहभागी हुनुहुन्छ। भेटमा ओली पक्षबाट उनीसहित विष्णु पौडेल, शंकर पोखरेल, सुवास नेम्वाङ लगायत सहभागी हुनुभएको छ नेपाल पक्षबाट उहाँसहित भीम रावल, घनश्याम भुसाल, सुरेन्द्र पाण्डे, रघुजी पन्त र गोकर्ण विष्ट सहभागी हुनु्हुन्छ। ओली र नेपालबीच बिहीबार सकारात्मक छलफल भएको थियो। उहाँहरुको छलफलपछि नै नेपाल पक्षीय सांसदहरुले गर्ने भनिएको राजीनामा रोकिएको थियो।ओली र नेपालबीच कार्यदल बनाएर पार्टीभित्रको विवाद समाधान गर्ने सहमति समेत भएको थियो। आजको भेटमा सहभागी नेताहरु नै कार्यदलमा रहने भनिए पनि यसलाई औपचारिकता दिइएको छैन। नेपाल पक्षले २०७५ जेठ २ गतेको संरचनामा पार्टीलाई लैजानुपर्ने अडान लिएको छ। ओली पक्षले भने कार्यदल बनाएर समाधान खोज्ने प्रस्ताव राख्दै आएको छ।