काठमाडौँ, १ जेठ । विश्व स्वास्थ्य सङ्गठन (डब्ल्यूएचओ)ले नेपालमा कोरोना भाइरस सङ्क्रमणको अवस्था चिन्ताजनक अवस्थामा पुगेको जनाएको छ ।डब्ल्यूएचओका निर्देशक टेड्रोस अडनोम गेब्रियसले नेपालमा कोरोना महामारीको अवस्था चिन्ताजनक अवस्थामा पुगेको बताउनुभएको हो । निर्देशक गेब्रियसले भारतसँगै नेपाल, श्रीलङ्का, भियतनाम, थाइल्याण्ड लगायतका देशको अवस्था चिन्ताजनक भएको भन्दै अन्तर्राष्ट्रिय सहयोग चाहिएको बताउनुभयो ।नेपालमा अस्पताल भर्ना हुनुपर्ने बिरामी बढिरहेको र उनीहरुको लागि बेड र अक्सिजन नै उपलब्ध हुन नसक्ने अवस्था आएको भन्दै यसले अब थप जटिलताहरु आउने निर्देशक गेब्रियसले बताउनुभयो । विश्वडब्ल्यूएचओले बालबालिका तथा किशोर किशोरीहरुलाई कोरोना विरुद्धको खोप दिने निर्णय पुनर्विचार गर्न आग्रह समेत गरेको छ ।

निर्देशक गेब्रियसले बालबालिका तथा किशोररकिशोरीका लागि खोप दिनुको सट्टा गरिब देशका वयस्क मानिसको लागि सहयोग गर्न धनी देशहरुलाई आग्रह गर्नुभएको हो । उहाँले कोरोना विरुद्धको खोपको वितरण असमान् रहेको भन्दै पहुँच कम भएका मानिसलाई खोप पुर्याउन कोभ्याक्सका लागि आपूर्ति बढाउन आग्रह पनि गर्नुभयो ।

अमेरिकाले गएको हप्ता १२ देखी १५ वर्षका किशोर किशोरीलाई खोप दिने घोषणा गरेको थियो । अरु देशले पनि तयारी गरिरहेका छन् । यसबाट कम आय भएका देशका वयस्क मानिसले खोप पाउने समय पर धकेलिने भन्दै डब्ल्यूएचओले अहिले वयस्क मानिस नै खोपको आवश्यकतामा रहेको बताएको छ ।सबै स्वास्थ्यकर्मीहरुले समेत खोप नपाइरहेकोले अहिले स्वास्थ्यकर्मी लगायत कोरोना विरुद्ध अग्र पङ्क्ति मा रहेकाहरुलाई प्राथमिकता दिन पनि निर्देशक गेब्रियसको आग्रह छ ।