काठमाडौं, २५ पुस । अदालतको मानहानी गरेको आरोपमा सोमबार राति पक्राउ परेका डा गोविन्द केसीको समर्थनमा माइतीघर मण्डलामा मंगलबार बिहानैदेखि प्रदर्शन सुरु भएको छ । केसीका समर्थकहरुले रिहाइ र सर्वोच्चको फैसला खारेजीको माग राखी मंगलबार बिहानैदेखि प्रदर्शन शुरु गरेका हुन् ।

सर्वोच्चको आदेशबाट सोमबार राति डा केसीलाई अनसनस्थलबाटै पक्राउ गरिएको थियो । जुन कामको चौतर्फी आलोचना भइरहेको छ । केसीका समर्थकले आज बिहान ८ बजेबाट माइतीघर मण्डलामा प्रदर्शन गरेका हुन् ।

माइतीघरको प्रदर्शनमा पूर्वप्रधानमन्त्री डा बाबुराम भट्टराई, कांग्रेस नेता गगन थापा, साझा विवेकशील पार्टीका संयोजक रविन्द्र मिश्र लगायत अग्रपंक्तिमा देखिएका छन् । प्रहरीले सर्वोच्च अदालत वरपर कडा पहरा दिइरहेका छन् । प्रदर्शनमा राजनीतिक दलका नेतादेखि विभिन्न पेसाकर्मी सहभागी छन् । पूर्वप्रधानमन्त्री भट्टराई र पूर्वस्वास्थ्यमन्त्रीसमेत रहेका थापाले समेत प्रदर्शनकारीहरुलाई आफ्नो साथ रहेको घोषणा गर्नुभएको छ ।

यस्तै कलाकारहरु अमृत गुरुङ, गिरिश खतिवडा, निर्मल शर्मालगायत केसीको समर्थन गर्न माइतीघरमा भेला भएका छन् । चिकित्सा शास्त्र अध्ययन संस्थान आईओएमको डीनमा शशि शर्मालाई पुनर्वहाली गर्ने सर्वोच्चको आदेशपछि डा। केसी प्रधानन्यायाधीश गोपालप्रसाद पराजुलीको राजीनामा माग गर्दै सोमबार अनसनमा बसेका थिए ।

अनसनलगत्तै सर्वोच्चले बदलाको शैलीमा केसीलाई पक्राउ गर्न आदेश दिएको थियो । केसीलाई सोमबार राति पक्राउ गरेर सिंहदरबारस्थित प्रहरी कार्यालयमा राखेको थियो । डा केसीलाई आज ९ बजे अदालतमा सर्वोच्च अदालतमा उपस्थित गराएको छ ।