काठमाडौं, २८ असार  । चार दिने नेपाल भ्रमणमा रहनु भएका चिनियाँ कम्युनिस्ट पार्टी ९सीपीसी० विदेश विभागका प्रमुख लिउ चियानछाओले नेकपा एमालेका अध्यक्ष केपी शर्मा ओलीको निवासमा साढे चार घण्टा भन्दा बढी समय बिताउनु भएको छ ।

पूर्वप्रधानमन्त्रीसमेत रहनुभएका एमाले अध्यक्ष ओली निवासमा चिनियाँ उच्च नेताले चार घण्टा समय ब्यतित गरी दुई पार्टीबीचको मित्रता निकै कसिलो रहेको सन्देश प्रवाह गरिएको हो । चिनियाँ नेता लिउ नेतृत्वको टोली आज बिहान १० बजे बालकोट पुगेको थियो भने निस्कदा आएर साढे २ बजेको थियो ।

ओली निवास बालकोटमा उहाँ नेतृत्वको एमालेको टोली र लिउ नेतृत्वमा रहेको सीसीपीको टोलीबीचमा लामो छलफल भएको छ । भेटवार्तामा सहभागी स्थायी कमिटी सदस्य एवं परराष्ट्र मामिला बिभाग प्रमुख डा। राजन भट्टराईका अनुसार दुई पार्टीबीच द्विपक्षीय कुराकानी भएको छ । उहाँका अनुसार लिउ उक्त अवसरमा झन्डै साढे एक घन्टा लन्च खान समय लागेको थियो ।

भेटमा लिउसँग ओलीले नेपाल र चीनबीच कुनै पनि समस्या नरहेको बताउनु भएको छ । ‘नेपाल र चीनबीचको सम्बन्ध समस्यारहित छ । विगतदेखि नै हामी एक चीन नीतिमा अडिग छौं र विगतमा जस्तै नेपाली भूमिमा चीनसहित हाम्रो कुनै पनि मित्रराष्ट्रहरुविरुद्ध गतिविधि हुन दिदैनौं,’ ओलीको भनाइलाई उद्धृत गर्दै भट्टराईले भन्नुभयो ।

भेटमा अध्यक्ष ओलीले लिउलाई राष्ट्रिय, क्षेत्रीय र अन्तर्राष्ट्रिय परिवर्तन आउँदासमेत एमालेको चीन नीति उही रहने प्रस्ट पार्नुभएको छ । ‘हामी पारस्परिक समानता र लाभको आधारमा सम्बन्ध राख्छौं,’ ओलीको भनाई थियो । ओलीले चीनले अघि सारेको बेल्ट एन्ड रोड इनिसियटिभ (बीआरआई) लाई इंगित गर्दै नेपाल र चीनबीच भएको सहमतिहरुलाई अघि बढाउन पर्नेमा जोड दिनुभएको छ । ‘हिजो दुवै मुलुकको हितको लागि हामीले जे–जे सहमति गरेका थियौं, त्यसलाई अघि बढाउन जरुरी छ,’ ओलीको भनाइ थियो ।

चिनियाँ नेता लिउले नेपाल, नेपाली जनता र एमालेले एक चीन नीतिप्रति खेलेको भूमिकालाई लिएर प्रशंसा गर्नुभएको थियो । आफ्नो धारणा राख्नेक्रममा लिउले चीनले कुनै पनि देशमा हस्तक्षेप नगर्ने र नेपालमा पनि त्यो नहुने प्रस्ट पारेको भट्टराईले जानकारी दिनुभयो ।

‘चीनले नेपाललाई विकास साझेदार रूपमा बढाउँदै आएको छौं र अरु थप अघि बढाउन चाहन्छ,’ लिउको भनाइ थियो, ‘चीनले आफै हिसाबले मार्क्सवादलाई व्याख्या गरेको र नेपालमा तपाईंहरुले आफ्नै हिसाबले व्याख्या गर्नु भएको छ । हामी आ–आफ्नो हिसाबमा अघि बढेका छौं ।’ लिउले एमालेले चीनमाथि लिएको नीतिलाई लिएर उच्च प्रसंसासमेत गर्नुभएको थियो ।

भेटबार्तामा एमालेका तर्फबाट अध्यक्ष ओलीसहित उपमहासचिवद्वय प्रदीप ज्ञवाली र बिष्णु रिमाल, परराष्ट्र मामिला बिभाग प्रमुख भट्टराई, सचिव डा. अञ्जान शाक्यलगायतका नेताहरु सहभागी हुनुभएको थियो ।