काठमाडौँ, २२ फागुन । नेकपा (एमाले)का अध्यक्ष केपी शर्मा ओलीले शान्ति प्रक्रिया टुंगोमा पुर्‍याउन नमान्ने प्रधानमन्त्री पुष्पकमल दाहाल ‘प्रचण्ड’ भएको बताएका छन् ।

आज एमालेले पार्टी केन्द्रीय कार्यालय च्यासलमा सांसदहरूलाई प्रशिक्षण दिँदै उनले यस्तो बताएका हुन् । “पहिलो पटक प्रधानमन्त्री हुँदा द्वन्द्वकालीन मुद्दा टुंग्याउन आग्रह गर्दा प्रचण्डले मान्नुभएन । कहिले के भनेर कहिले के भनेर पन्छिनुभयो,” उनले भने ।

अध्यक्ष ओलीले भने, “मैले प्रचण्ड र शेरबहादुरजीलाई पटकपटक भनेँ । द्वन्द्वका प्रमुख पक्ष र विपक्ष तपाईंहरू हो । यसको खाका बनाउँ । म दुवै हातका औँठा छाप गरिदिन्छु भने तर उहाँले वास्ता गर्नुभएन ।”

पूर्वप्रधानमन्त्रीसमेत रहेका ओलीले लोकतन्त्र रक्षाका लागि आफ्नो पार्टी कांग्रेससँग सहकार्य गर्न तयार रहेको बताए । तर, त्यस्तो सहकार्य व्यक्तिगत स्वार्थका लागि नभई राष्ट्रिय स्वार्थका लागि हुने उनले दाबी गरे ।

“लोकतन्त्रको रक्षा गर्ने सर्तमा एमाले कांग्रेससँग सहकार्य गर्न तयार छ । एमाले व्यक्तिगत स्वार्थका लागि कसैसँग सहमति गर्दैन तर राष्ट्रिय स्वार्थका लागि सबैसँग सहकार्य गर्न तयार छ,” उनले भने ।