बैतडी, १८ चैत । बैतडीको मेलौली नगरपालिकाले माध्यमिक शिक्षा परीक्षा (एसइई)को केन्द्र तोकिएका विद्यालय वरिपरिका क्षेत्रलाई मदिरा निषेधित क्षेत्र घोषणा गरेको छ ।
शुक्रबारदेखि सञ्चालन हुने एसइईलाई मार्यादित वातावरणमा सम्पन्न गर्नका लागि मणिलेक मावि काँडा, दुर्गा मावि खलिगाड र विजयपुर मावि तितावै आसपासका क्षेत्रलाई मदिरा निषेधित क्षेत्र घोषणा गरिएको नगर प्रमुख भीमबहादुर चन्दले बताए । ती क्षेत्रहरुमा परीक्षा अवधिभर कसैले मदिराको कारोबार गरेमा कानुनअनुसार कारबाही गरिने नगरपालिकाले जनाएको छ ।
यस्तै, परीक्षाको अवधिमा दैनिक उपभोग्य वस्तु तोकिएको दररेटभन्दा बढीमा बिक्री नगर्न आग्रह गरिएको छ । कसैले तोकिएको दररेटभन्दा बढीमा उपभोग्य वस्तु बिक्री गरेमा कारबाही हुने नगरपालिकाले जारी गरेको सूचनामा उल्लेख गरिएको छ ।
प्रतिक्रिया दिनुहोस्