चितवन,माघ २२ । बाघ, एसियाली गैंडा र हात्तीको चिकित्सा बिज्ञान सम्वन्धी ४ दिने क्षेत्रिय कार्यशाला आजदेखी चितवनको सौराहामा सुरु भएको छ । कृषि तथा वन विज्ञान विश्वविद्यालय पशु विज्ञान,पशु चिकित्सा,मत्स्य विज्ञान संकाय र राष्ट्रिय प्राकृतिक संरक्षण कोषको संयुक्त आयोजनामा सुरु भएको कार्यशालामा नेपाल सहित १३ देशका ८७ जना विज्ञहरुको सहभागिता रहेको छ ।

अष्ट्रेलिया,चीन,भारत,इन्डोनेसिया,मंगोलिया,म्यानमार,पाकिस्तान,रुस,थाइल्याण्ड,बेलायत,अमेरिका र भियतनामका पशु विज्ञहरु कार्यशालामा सहभागि भएका छन् । वन्यजन्तुको स्वास्थ्य र वन्यजन्तुको जीव विज्ञान सम्वन्धी ३३ ओटा कार्यपत्र र ८ वटा पोष्टरहरु कार्यक्रममा प्रस्तुत हुंदैछ । कार्यपत्रमाथीको व्यापक छलफल पछि सौराहा घोषणापत्र जारी गरिन जनाइएको छ ।

विभिन्न देशका विज्ञ सहभागी कार्यशालामा अनुभव र ज्ञान आदानप्रदान हुने कृषि तथा बन विज्ञान विश्वविद्यालय पशु विज्ञान,पशु चिकित्सा तथा मत्स्य विज्ञान संकायका डीन प्राध्यापक डा. शारदा थपलियाले जानकारी दिनुभयो ।

उहांले नेपालभित्र बाघ गैडा र हात्तीलाई महत्वपूर्ण प्रजातिको रुपमा राखेर संरक्षणको काम भएपनि स्वस्थ्य सम्वन्धी थोरैमात्र काम भएको वताउनुभयो । बन्यजन्तुको संरक्षणका लागी स्वास्थ्य पनि महत्वपूर्ण पाटो भएकाले पशु चिकित्सा शिक्षामा वन्यजन्तुको पनि अध्यापन वढाउनुपर्ने वताउनुभयो ।

आर्थिक स्रोत ,प्रविधि र प्राविधिकको कमिका कारण सोचे अनुसार काम गर्न नसकिएको उहांको भनाई छ ।