काठमाडौं, असार १० । सत्तारूढ दल राष्ट्रिय स्वतन्त्र पार्टी (रास्वपा) को प्रथम महाधिवेशनबाट रवि लामिछाने पुनः सभापति पदमा निर्विरोध निर्वाचित भएका छन्। सभापतिमा रविको निर्विरोध चयनसँगै पार्टीका वरिष्ठ नेता तथा प्रधानमन्त्री बालेन्द्र शाह ले मध्यराति सामाजिक सञ्जालमार्फत पार्टीलाई शुभकामना व्यक्त गरेका छन्।

चितवनमा जारी महाधिवेशनमा मंगलबार बालेनकै प्रस्तावमा रविले सभापति पदका लागि उम्मेदवारी दिएका थिए। निर्धारित समयसम्म अन्य कुनै उम्मेदवार नउठेपछि रास्वपाको केन्द्रीय निर्वाचन आयोगले उनलाई निर्विरोध निर्वाचित भएको घोषणा गरेको हो।

रविको पुनः नेतृत्व सुनिश्चित भएपछि वरिष्ठ नेता बालेनले सामाजिक सञ्जालमा आफू र रविको स्केच तस्बिर सार्वजनिक गर्दै पार्टीप्रति शुभेच्छा व्यक्त गरेका हुन्। उनले रोमन लिपिमा लेखेका छन्, “Shubhakamana hamro partylai. Sabai jana safal hunus. Deshlai safal banaunus.” अर्थात्, “शुभकामना हाम्रो पार्टीलाई। सबै जना सफल हुनुस्। देशलाई सफल बनाउनुस्।”

रास्वपाको विधानअनुसार सभापति र वरिष्ठ नेता पदका लागि उम्मेदवार बन्न केन्द्रीय सदस्यमा निर्वाचित भइसकेको हुनुपर्ने व्यवस्था छैन। यही व्यवस्थाअनुसार रवि लामिछाने सभापति पदमा प्रतिस्पर्धामा उत्रिएका थिए।

महाधिवेशनअन्तर्गत अब बाँकी पदका लागि निर्वाचन प्रक्रिया अघि बढ्ने भएको छ। बुधबार पहिलो चरणमा केन्द्रीय सदस्य पदका लागि मतदान हुने निर्वाचन आयोगले जनाएको छ। मतदानको समय भने अझै सार्वजनिक गरिएको छैन।

रास्वपाको केन्द्रीय निर्वाचन आयोगका प्रमुख भुवन केसी का अनुसार मतदान सम्पन्न भएको करिब दुई घण्टाभित्र मतगणना गरी परिणाम सार्वजनिक गरिनेछ।

रवि लामिछानेको पुनः निर्विरोध चयनले पार्टीभित्र उनको नेतृत्वमा रहेको विश्वासलाई पुनः पुष्टि गरेको विश्लेषण भइरहेको छ भने आगामी केन्द्रीय सदस्य तथा अन्य पदाधिकारीहरूको निर्वाचनले रास्वपाको नयाँ संगठनात्मक संरचनाको तस्वीर स्पष्ट पार्ने अपेक्षा गरिएको छ।