काठमाडौं २५ साउन । प्रधानमन्त्री पुष्पकमल दाहाल प्रचण्डले सरकारको भ्रष्टाचारविरोधी अभियानका कारण राज्यदोहन गर्ने र तस्करहरू अत्तालिएको बताएका छन्।
क्याबिनेटका मन्त्रीहरूसँग बिहीबाबर आर्थिक वर्ष २०८०र८१को लागि कार्यसम्पादन सम्झौताका क्रममा उनले सो कुरा बताएका हुन्।
‘सरकार भ्रष्टाचारविरोधी अभियानका कारण राज्यदोहन गर्ने र तस्करहरु अत्तालिएका छन्। सरकारले अझै भ्रष्टाचारविरोधी कदम चालोस् भन्ने पक्षमा जनता छन्,’ प्रधानमन्त्री प्रचण्डले भनेका छन्।
प्रधानमन्त्री प्रचण्डले दोषी नछुटुन र निदोर्ष नपरुन् भन्ने पक्षमा सरकार रहेको पनि बताए। साथै, उनले यही सरकार, कर्मचारीतन्त्र र यीनै संरचनाबाट परिवर्तन सम्भव छ भन्ने संकल्प लिनुपर्ने मन्त्रीहरूलाई बताए।
‘यही सरकार, कर्मचारीतन्त्र र यिनै संरचनाबाट परिवर्तन सम्भव छ भन्ने संकल्प लिनुछ देश कुन परिस्थितिमा छ हामीलाई थाहा छ। राजनीतिक नेतृत्वमा रहेका हामी र कर्मचारी तहका तपाईंहरुले मिलेर संकल्प गरेर अघि बढ्नुपर्छ,’ प्रधानमन्त्री प्रचण्डले भने, ‘परिणाम निकाल्ने कुरामा कर्मचारीले संकल्प नलिएसम्म जनताको अपेक्षा पूरा हुन सक्दैन। परिणाम र प्रतिफलमा हामीले चाहे जस्तो उपलब्धी गर्न सकेका छैनौँ बहुसंख्यक जनताले विकासको अनुभूति अझै गर्न सकेका छैनन्।’
३० प्रतिशत जनता विदेशमा गएर निम्नस्तरको रोजगारीमा आश्रित हुन बाध्य भएको उल्लेख गर्दै प्रधानमन्त्री प्रचण्डले भने, ‘हामीले संकल्प गरेपछि केही न केही पूरा हुन्छ। देशभित्रको विकास, अर्थतन्त्रलाई सहज बनाउने, विदेशसँगको सम्बन्ध सहज बनाउने र अन्तर्राष्ट्रिय सहयोग जुटाउने कुरामा काम हुँदैछ। हामी उज्यालोतिर बढिरहेका छौँ।’
प्रतिक्रिया दिनुहोस्