विराटनगर २५ साउन। नेपाली कांग्रेसका सांसद डा. सुनील शर्मा नक्कली शैक्षिक प्रमाणपत्रको विषयलाई लिएर बिहीबार पक्राउ परेका छन् ।

झापाको दमकमा २०३४ पुस २२ गते जन्मिएका शर्मा विराटनगरस्थित नोबेल मेडिकल कलेजका सञ्चालक हुन् । उनी २०७९ का संसदीय निर्वाचनमा मोरङको निर्वाचन क्षेत्र नम्बर ३ बाट प्रतिनिधिसभा सदस्यमा निर्वाचित भएका थिए ।
मोरङस्थित आफ्नो निर्वाचन क्षेत्रका सर्वसाधारणलाई निःशुल्क उपचार गराएर शर्मा निकै चर्चामा आएका थिए । उनले निःशुल्क एम्बुलेन्स उपलब्ध गराउनुका साथै मेडिकल कलेजमाफृत निःशुल्क स्वास्थ्य शिविरसमेत सञ्चालन गर्दै आएका छन् ।

प्रहरीको केन्द्रीय अनुसन्धान ब्युरो (सीआईबी)ले डा. रञ्जितकुमार यादवलाई पक्राउ गरेको छ ।
नक्कली शैक्षिक प्रमाणपत्रको आरोपमा उनलाई पक्राउ गरेको सीआईबी स्रोतले बतायो ।
नेकपा एमालेका भानुभक्त ढकाललाई फराकिलो मतान्तरले पराजित गरेका शर्मा २०७४ को निर्वाचनमा भने उनै ढकालसँग पराजित भएका थिए । पछिल्लो निर्वाचनमा शर्माले ४८ हजार ६३१ मत प्राप्त गर्दा एमालेका ढकालले २५ हजार ८९५ मत पाएका थिए ।

नेपाली कांग्रेसको १३औँ राष्ट्रिय महाधिवेशनमा शर्मा महाधिवेशन प्रतिनिधि थिए । पार्टीको आन्तरिक चुनावमा मोरङको केराबारी गाउँपालिकामा शर्माले गोपाल थापालाई पराजित गरेका थिए ।

मोरङको बेलबारी नगरपालिका स्थायी बसोबास भएका शर्माले माध्यमिक तहको अध्ययन कालिकोटमा गरेको बताइन्छ । त्यो भन्दा अगाडि शर्मा मोरङकै लेटाङ नगरपालिकास्थित लेटाङ माध्यमिक विद्यालय अध्ययन गर्थे । अनुत्तीर्ण भएपछि उनी अध्ययनकै लागि कालिकोट गएको बताइन्छ । त्यहाँ पञ्चदेव उच्च माविमा ९ कक्षामा भर्ना भएका उनी मामासँग बस्थे । लेटाङमा भने शर्मा राजेन्द्र न्यौपानेको नामबाट परिचित थिए । पछि सुनील शर्माको नामबाट चिनिन थालेका थिए ।

कांग्रेसका मोरङ जिल्लास्थित एक नेताका अनुसार शर्मा नोबेल मेडिकल कलेजको सञ्चालक भएर आएपछि कांग्रेसको राजनीतिमा सक्रिय भएका हुन् । पछिल्लो समय उनी नेपाली कांग्रेसका नेता डा। शेखर कोइराला निकट मानिन्थे । कोइरालाकै सिफारिसमा शर्माले मोरङको निर्वाचन क्षेत्र नम्बर ३ बाट प्रतिनिधिसभा सदस्य पदका लागि टिकट पाएका थिए ।

नोबेल मेडिकल कलेजका तत्कालीन सञ्चालक डा. ज्ञानेन्द्र गिरी, नवराज पाण्डेलगायतलाई माओवादी शान्ति प्रक्रियामा आउनबित्तिकै काभ्रेमा लगेर कुटपिट गराएको आरोपसमेत उनीमाथि छ । २०६४ सालमा बिना सेयर नोबेलमा लगानीकर्ता बनेका शर्मा त्यसपछि विभिन्न प्रक्रियाबाट आफ्नो एकल स्वामित्वमा ल्याउन सफल भएका थिए ।

२०७३ सालमा नक्कली प्रमाण पत्रधारी चिकित्सकविरुद्ध सीआईबीले ‘क्वाक अपरेसन’ सञ्चालन गरेपछि शर्मा लामो समयसम्म जापान र दुबईमा लुकेर बसेका थिए । शर्माको आईएसीको सर्टिफिकेट भारतीय भएको बताइन्छ । उनले एमबीबीएस चीनबाट उत्तीर्ण गरेको दाबी गर्दै आएका छन् ।

सुनील शर्मा हालैमात्र ओशो तपोवन गई साता लामो ध्यान शिविरमा बसेर ओशो सन्न्यासी बनेका छन् । उनले स्वामी आनन्द अरूणबाट सन्न्यास धारणा गरी ओशो मालासमेत लिएका छन् ।