काठमाडौं २७ साउन । अर्थमन्त्री प्रकाशशरण महतले अर्थतन्त्रमा देखिएका समस्या अस्थायी भएकाले डराउनुपर्ने अवस्था नरहेको बताएका छन्।

शनिबार ललितपुरमा आयोजित एक कार्यक्रमलाई सम्बोधन गर्दै उनले अर्थतन्त्रमा अस्थायी समस्या देखिएको बताएका हुन्।

‘अहिले नेपाल पनि विस्तारै विकासको बाटोमा अघि बढेको छ। अहिले कोरोना भाइरस लगायत विविध कारणले अर्थतन्त्रमा केही समस्या देखिएका छन्। तर यो अस्थायी हो र नेपाल अब अघि बढ्छ,’ उनले भने।

उनले नेपालमा व्यापार व्यवसाय गर्न ठूलो अवसर रहेको भन्दै नेपाल विदेश भन्दा सबै किसिमले व्यापार व्यवसायका लागि राम्रो रहेको बताए।

उनले नेपालमा आइटी क्षेत्रले उल्लेखनीय काम गरिरहेको भन्दै बजेटमा पनि आइटी क्षेत्रमा लगानी गर्ने लगानीकर्ताका लागि राम्रो अवसर दिएको बताए।

‘नेपालमा व्यापार व्यवसाय गर्न ठूलो अवसर छ, विदेश गएकाहरूले पनि नेपालमा अवसर छ भनेर फर्केर आएर यहाँ प्रविधि प्रयोग गरी राम्रो गरिरहेका छन्,’ उनले भने, ‘आइटी क्षेत्र राम्रो बन्दै गइरहेको छ। नेपाली युवाहरू सफ्टवेयर निर्यात गरिरहेका छन् विदेशमा। नेपाललाई पनि फाइदा गरिरहेका छन्, आफ्नो जीवन पनि राम्रो बनाइरहेका छन्।’

उनले आइटी क्षेत्रको प्रवर्द्धन गर्न ५० प्रतिशत कर कम गर्ने निर्णय गरेको पनि बताए।

‘आइटी क्षेत्रका लागि धेरै ठूलो लगानी गर्न पर्दैन। यसको लागि समर्पण र स्किल भए पुग्छ। त्यसमा पनि लाग्न अनुरोध गर्छु। यस पटकको बजेटमा आइटी क्षेत्रमा लगानी गर्नेलाई ५० प्रतिशत कर कम गर्ने निर्णय गरेको छु,’ उनले भने।