काठमाडौं, २८ साउन । अध्यागमन विभागले शुक्रबार साउन २६ गते व्यवसायी राकेश अडुकियाका छोरा रोहनलाई विमानस्थलबाटै नियन्त्रणमा लियो । भारतको नयाँ दिल्लीबाट आउने क्रममा उनलाई त्रिभुवन अन्तर्राष्ट्रिय विमानस्थलमा दिउँसो १ बजे अध्यागमनले नियन्त्रणमा लिएको थियो ।

अध्यागमनले २१ घण्टा हिरासतमा राखेपछि उनलाई शनिबार विहान १० बजे छोडेको थियो । उनलाई जे आशंकामा पक्राउ गरिएको थियो त्यसमा उनको संलग्नता नभेटिएपछि छोडिएको थियो । “हामीले बोलाएको बेला अध्यागमनमा हाजिर हुने सर्तमा रोहन अडुकियालाई छोडेका हौं,” अध्यागमन विभागका महानिर्देशक झलकराम अधिकारीले बाह्रखरीसँग भने ।

कुनै आपराधिक गतिविधिमा संलग्न नै नभएको व्यक्तिलाई किन पक्राउ गरियो त

महानिर्देशक अधिकारी भन्छन्, “त्रिभुवन अन्तर्राष्ट्रिय विमानस्थललगायतका नाकाबाट आवतजावत गर्ने शंकास्पद व्यक्तिहरुलाई हामी वाच लिस्ट निगरानी सूची मा राख्छौं । रोहन पनि हाम्रो वाच लिस्टमा थिए । यसैकारण उनलाई पक्राउ गरिएको थियो ।”

बाहिर प्रचारमा आएजस्तो रोहनलाई ‘ब्ल्याक लिस्ट’ कालो सूचीमा राखिएको थिएन । रोहन र उनको बुबा राकेश दुवै जनालाई अध्यागमनले वाच लिस्टमा राखेको उनले बताए । अहिले अध्यागमनको वाच लिस्टमा रोहन र राकेशलगायत दुई सय जना रहेको उनको भनाइ छ ।

अध्यागमनले त्यस्ता व्यक्तिलाई वाच लिस्टमा राख्छ जो बारम्बार त्यस्ता गन्तव्यमा जान्छन् जहाँ ‘आपराधिक क्रियाकलाप’ बढी हुने गर्छन् ।

महानिर्देशक अधिकारीका अनुसार अफगानिस्तान र पाकिस्तान बारम्बार जानेलाई ड्रग्स कारोबारीको आशंका गरिन्छ । यस्तै दुबई र हङकङ धेरै पटक आवतजावत गर्नेलाई सुन तस्करीको आशंकामा वाच लिस्टमा राखिन्छ ।

अडुकियाका बाबुछोरालाई सुन तस्करीमा संलग्न रहेको आशंकामा वाच लिस्टमा राखिएको महानिर्देशक अधिकारीले बताए । यही साउन ३ गते हङकङबाट ब्रेक सु मा नेपाल भित्रिएको एक क्विन्टलभन्दा बढी सुन राजस्व अनुसन्धान विभागले बरामद गरेको थियो ।

त्रिभुवन अन्तर्राष्ट्रिय विमानस्थलबाट भन्सार पास भइसकेको अवस्थामा राजस्वका कर्मचारीले उक्त सुन बरामद गरेका थिए । सो बरामद भएको सुन तस्करीमा अडुकियाको बाबुछोराको नाम जोडिएर समाचार आएपछि र पछिल्लो समय उनीहरुले दुबई र हङकङकमा गरेको आवतजावतलाई लिएर अध्यागमनले वाच लिस्टमा उनीहरुलाई राखेको थियो ।

“वाच लिस्टमा राखेका व्यक्तिलाई पक्राउ गरेर सोधपुछ गर्ने गरिन्छ । यही सिलसिलामा रोहन अडुकियालाई पनि पक्राउ गरेर सोधपुछ गरिएको हो,” अध्यागमनका महानिर्देशक अधिकारीले भने ।

पक्राउ परेका रोहनलाई अध्यागमनले सुरुमा राजस्व अनुसन्धान विभागलाई बुझाउन खोजेको थियो । विभागले रोहन आफूहरुले खोजी गरेको व्यक्ति नभएको जनायो । त्यसपछि नेपाल प्रहरीको केन्द्रीय अनुसन्धान ब्यूरो सीआईबीलाई बुझाउन खोज्यो ।

सीआईबीले पनि सुन तस्करीमा रोहनको संलग्नता हालसम्म नभेटिएको बताएको थियो । त्यसपछि वाच लिस्टमा रहेको भन्दै रोहनलाई अध्यागमनले छोडेको थियो ।