काठमाडौं, ५ साउन । प्रमुख प्रतिपक्षी दल नेकपा एमाले अध्यक्ष केपी शर्मा ओली अनुपस्थित भएपछि प्रधानमन्त्री पुष्पकमल दाहाल प्रचण्डले मंगलबारका लागि बोलाएको राष्ट्रिय दल मान्यताप्राप्त दलहरूको बैठक स्थगन भएको छ ।

बैठक दिउँसो २ बजेका लागि बोलाइको थियो । तर, ओलीले स्वास्थ्य समस्या देखाएर बैठकमा अनुपस्थित भएपछि बैठक अघि बढ्न नसकेको राष्ट्रिय स्वतन्त्र पार्टीका प्रमुख सचेतक सन्तोष परियारले बाह्रखरीलाई जानकारी दिए ।

“बैठक बस्न सकेन । प्रमुख प्रतिपक्षी दलको नेता अनुपस्थित हुनुभयो । स्वास्थ्य समस्यालाई कारण देखाएर आउनुभएन,” परियारले भने ।

एमालेले सुन तस्करी प्रकरणमा उच्चस्तरीय छानबिन समिति बनाउनुपर्ने मागसहित सदन चल्न दिएको छैन । सोमबार रातिको बैठकमा समिति बनाउने सहमति भएको थियो ।

आज बस्ने बैठकले समितिको विषयमा मस्यौदा बुझाउने र बैठकले त्यसलाई अन्तिम रूप दिने तयारी गरेको थियो । तर, ओलीको अनुपस्थितिमा बैठक बस्न सकेन ।