रुकुम, ९  कार्तिक  । प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले पार्टीले सुरू गरेको तीन महिने विशेष रुपान्तरण अभियान माओवादी घटक दलबीचको एकताको अभियान पनि रहेको बताएका छन् ।

रुकुम पश्चिमको बाँफिकोट गाउँपालिका–६ मग्गामा बिहीबार आयोजित सहिद स्मृति मेलाको उद्घाटन गर्दै उनले अब माओवादीबाट फुटेर गएका दलहरुका बीचको एकताको आवश्यकता रहेको बताए ।

प्रचण्डले भने, ‘हामी ठूलो पार्टीको रूपमा उदाएका थियौं । विडम्बना हामी सबै फरक-फरक बाटोतिर लाग्यौं । हामीले क्रान्ति गर्ने बेला जुन किसिमको प्रतिवद्धता जनतासामु गरेका थियौं, त्यो प्रतिवद्धता भुल्दै साथीहरू फरक बाटोतिर लाग्नुभयो । शान्ति प्रक्रियापछि उहाँहरूलाई के कुरा चित्तै बुझेन पार्टी नै फुटाउनुभयो ।’केही साथीहरू फरक बाटोमा लागेको भए पनि अझै केही नबिग्रिएको उनले बताए ।

‘हामी माओवादी शक्तिहरू पुनः एक हुनुपर्ने बेला आएको छ । हामीले समाजवादी मोर्चा नै बनाएका छौं । त्यही मोर्चा नै भोलि एकताको बाटोमा जान्छ । समाजवादी मोर्चाको एउटा अभियान छ । हाम्रो पार्टीको एउटा अभियान छ । यो अभियानको सार्थकता भनेकै माओवादी घटक र अन्य विचार मिल्ने पार्टीको एकता हो’, प्रधानमन्त्रीको भनाइ छ ।

प्रधानमन्त्री दाहालले अहिलेकै सरकार ५ वर्ष टिक्ने दाबी गरे । उनले भने, ‘हामीले निकै बलियो सरकार बनाएका छौं । यो सरकार पाँच वर्ष नै रहन्छ । कोशी प्रदेशमा केही तलमाथि हुँदै गर्दा गठबन्धनकाविरुद्ध लागेको पनि देखियो । अन्ततस् कोशीमा पनि गठबन्धनकै सरकार बन्छ ।’

सरकार ढाल्न र गठबन्धन फुटाउनतर्फ केही दल लागिपरेको उनको आरोप छ । सरकारले पछिल्लो समय सामाजिक न्यायको लागि विभिन्न भ्रष्टाचारको फाइल खोलेको देख्दा केही दल सरकार ढाल्ने प्रयासमा रहेको उनको जिकिर छ ।

उनले थपे, ‘हामीले छिमेकी र मित्र राष्ट्रहरुसँगको कूटनीतिक सम्बन्धलाई बलियो बनाएका छौं । अझै पनि बलियो हुने छ । मैले भारत, चीन र अमेरिकाको भ्रमण पनि गरेँ । ती देशहरू नेपालको समृद्धि, विकासको विषयमा निकै सकारात्मक रहेको देखिन्छन्’, प्रचण्डले भने । अहिलेको सरकार बनेपछि सामाजिक न्यायको पक्षमा धेरै राम्रा काम भएको उनले बताए ।

प्रधानमन्त्रीले भने, ‘हामीले मिटरव्याजीलाई कारवाही गरेका छौं । नक्कली भुटानी शरणार्थी, सुन काण्डमा मुछिएकालाई समातेका छौं । यो काममा गठबन्धनमा रहेका राजनीतिक दलहरूको ठूलो साथ र सहयोग रहेको छ ।’