काठमाडौं, २४ मंसिर । लोकतान्त्रिक समाजवादी पार्टी लोसपामा अध्यक्ष महन्थ ठाकुर र वरिष्ठ नेता राजेन्द्र महतोबीच विवाद चर्किएको छ । वरिष्ठ नेता महतोले आज केन्द्रीय समितिको बैठक बहिष्कार गरेका छन् ।

काठमाडौंको बत्तीसपुतलीस्थित अनुपम फुडल्यान्डमा बैठक केही बेरमा सुरु हुँदै छ । तर, महतोनिकट एक पदाधिकारीका अनुसार झन्डै ५० प्रतिशतभन्दा बढी नेता बैठकस्थलमा पुगेका छैनन् ।

केन्द्रीय समितिमा पुराना नेताहरूलाई ठाकुरले नसमेटिएको भन्दै महतोले आपत्ति जनाएका हुन् ।

“केन्द्रीय समिति र कार्यकारिणी समिति दुई वर्ष लगाएर बनाइयो । तर, पुराना काम गरेका नेता–कार्यकर्ताहरूलाई राखिएको रहेनछ । मधेसको लागि लड्नेहरूलाई छोड्नुभएको रहेछ भनेर मैले दुई महिनाअघि कार्यकारिणी समिति बैठकमा हुँदैन भनेर विरोध गरेको थिएँ,” महतोले बाह्रखरीसित भने ।

उनले ठाकुर नेपाली कांग्रेसमा हुँदा नै मधेसका निम्ति लड्ने नेताहरूलाई पाखा लगाइएको आरोप लगाए ।

“तपाईं ९महन्थ ठाकुर० जति बेला कांग्रेसमा हुनुहुन्थ्यो, उनीहरू त्यति बेला लाठी, जुत्ता खाइरहेका थिए, यसरी छाड्न मिल्दैन, सम्मान गर्नुपर्छ भनेको थिएँ,” उनले भने, “उहाँ ९महन्थ ठाकुर०ले ठिक छ, म सुधार गर्छु भन्नुभयो । तर, अझै सुधार भएको रहेनछ । नभएपछि मैले विरोध गरेको हुँ ।”

गएको असोज ८ गते लोसपामा ३११ सदस्यीय केन्द्रीय समिति गठन गरिएको थियो । समितिमा ६३ पदाधिकारी थिए ।