जनकपुर, ९ पुस । सर्वोच्च अदालतले पुर्पक्षका लागि कारागार चलान गरेका आरती साहका श्रीमान् मोतीबाबु साह सोमबार जनकपुरबाट पक्राउ परेका छन् । सर्वोच्च अदालतको आदेशपछि फरार रहेका साहलाई जनकपुरको सीता चोकस्थित होटल सगुन प्लाजाबाट पक्राउ गरिएको धनुषाका प्रहरी प्रमुख एसपी मित्रबन्धु शर्माले जानकारी दिए ।

विशेष सूचनाका आधारमा साहलाई धनुषा प्रहरीले पक्राउ गरेको एसपी शर्माले बताए । ‘मोतीबाबुलाई हामी खोजी गरिरहेका थियौं । कहिले भारतमा गएर लुक्ने, कहिले नेपाल फर्किने गरेको सूचना हामीसँग थियो,’ एसपी शर्माले कान्तिपुरसँग भने,‘उनी शुक्रबार भारतबाट आएर जनकपुरको होटलमा बसिरहेको थाह पाएपछि पक्राउ गरिएको हो ।’ धनुषाका प्रहरी प्रमुख एसपी शर्माका अनुसार अदालतबाट म्याद थपेर उनलाई हाल धनुषा प्रहरीकै हिरासतमा राखिनेछ । ‘अदालतले कुन कारागारमा राख्न भन्छ, त्यसपछि हामी उनीलाई त्यही पठाइदिनेछु,’ एसपी शर्माले भने ।

जनकपुरधाम उपमहानगरपालिका वडा नम्बर ९ थापा चोककी २२ वर्षीया आरती साहको २०८० जेठ ७ गते घरमै रहस्यमय मृत्यु भएको थियो । दाइजोको निहुँमा आरतीलाई उनका पति मोतीबाबु र ससुरा मदनमोहन साहलगायत घरका अन्य सदस्य मिलेर यातना दिइ हत्या गरेको आरोप छ ।

धनुषा प्रहरीले सुरुमा आरतीको ‘हत्या’लाई आत्महत्या भन्दै मुद्दा सल्टाउन खोज्यो । तर, आरतीको हत्या नै भएको दाबी गर्दै उनका पिता विनोद साह, बहिनी मनिषा साह र आमा निर्मलादेवी संघर्षमा उत्रिनु पर्‍यो । धनुषा प्रहरीले अटेरी गरेपछि आरतीको माइती पक्ष न्यायका लागि काठमाडौं पुगेका छन् ।

धनुषा जिल्ला अदालतले आरतीको मुद्दामा उनका पति मोतीबाबु र ससुरा मदनमोहन साहलाई पुर्पक्षका लागि कारगार पठाइदिएको थियो । उच्च अदालत जनकपुरले भने जिल्ला अदालतको निर्णय उल्टाउँदै असोज १८ गते २०८० मा आरतीका पति मोतीबाबु र ससुरा मदनमोहनलाई कारागार मुक्त गरिदिएको थियो । तर सर्वोच्च अदालतले उच्च अदालतको फैसला उल्टाउँदै कारागार चलान गर्न आदेश दिएपछि उनलाई पक्राउ गरिएको हो ।

शुक्रबार जनकपुरको सगुन प्लाजा होटलमा कोठा बुक गर्दा मोतीबाबुले रविकुमार साह नामको सवारी चालक अनुमति पत्रको कार्ड दिएका थिए । जनकपुरको रमण कन्ट्रक्सनमा इञ्जिनियरको काम गर्ने बताउँदै मोतीबाबु सगुन प्लाजा होटलमा चार दिनदेखि बसिरहेका थिए । होटल सगुन प्लाजाका सञ्चालक रुपेश सिंहका अनुसार मोतीबाबुलाई भेट्न दिनहुँजसो मानिस थुप्रिन्थ्यो । ‘अबेर रातिसम्म उनका मानिसहरुको आउजाउ लागिरहन्थ्यो,’ होटल सञ्चालक सिंहले भने,‘होटलको मेन गेट लगाइदिएपछि अबेर राति आग्रह गरेर खोल्न लाथ्यो । नाम ढाँटेर बसेको रहेछ, हामीले चालै पाएनौं ।’