काठमाडौं २४ पौष । नेपाल विद्युत प्राधिकरणबाट वितरित ट्रंक र डेडिकेटेड लाइनको विवादका विषयमा आज संसदीय समितिमा छलफल हुँदै छ । बिहान ११ बजे बस्ने पूर्वाधार विकास समितिको बैठकमा ट्रंक र डेडिकेटेड लाइनका विषयमा छलफल हुन लागेको हो ।

डेडिकेटेड र ट्रंक लाइनको विवादका बीच महसुल नतिरेको भन्दै नेपाल विद्युत प्राधिकरणले विभिन्न उद्योगहरुको लाइन काटिदिएको छ । बिजुलीको लाइन काटिदिएको विरोधमा उद्योगी व्यवसायी र मजदुरहरुले प्रदर्शन गर्दै आएका छन् ।

यही सन्दर्भमा पूर्वाधार विकास समितिले डेडिकेटेड र ट्रंक लाइनका सन्दर्भमा छलफल गर्न लागेको हो । यही समितिमा प्रधानमन्त्रीको भारत भ्रमणका क्रममा नेपाल र भारत सरकारबीच भएको १० हजार मेगावाट विद्युत व्यापार सहमतिको अवस्था, महाकाली सन्धि र सो सन्धिको प्रावधानले सिर्जित पञ्चेश्वर जस्ता परियोजनाको हालको अवस्थाका बारेमा समेत छलफल गर्ने कार्यसूची छ ।

आजै अन्य चार संसदीय समितिका बैठकहरु पनि बस्दै छन् । बिहान ११ बजे नै बस्ने राज्य व्यवस्था तथा सुशासन समितिको बैठकमा संवैधानिक परिषद् ९काम, कर्तव्य, अधिकार र कार्यविधि सम्बन्धी ऐन, २०६६ लाई संशोधन गर्न बनेको विधेयकमा छलफल जारी रहने छ । यो समितिमा विधेयकमा २० पुसदेखि दफाबार छलफल हुँदै आएको छ ।