काठमार्डौ ११ माघ । नेपाल विद्युत् प्राधिकरणको डेडिकेटेड फिडर ट्रंक लाइनको महसुल भुक्तानीसम्बन्धी विवाद छानबिनका लागि गठित आयोगले बिहीबार सपथ लिएको छ।

छानबिन आयोगका अध्यक्ष गिरिशचन्द्र लालले बिहीबार प्रधानन्यायाधीश विश्वम्भरप्रसाद श्रेष्ठसमक्ष लालले पद तथा गोपनीयताको सपथ लिएका हुन्।

यो आयोग मन्त्रिपरिषद्को निर्णयबाट गत माघ ११ गते गठन भएको हो। आयोगमा ऊर्जा मन्त्रालयका सहसचिव र उद्योग मन्त्रालयका सहसचिव जीवलाल भुसाल सदस्य छन्।

लोडसेडिङका बेला केही उद्योगले प्रिमियम शुल्क लाग्ने डेडिकेटेड र ट्रंक लाइनबाट बिजुली प्रयोग गरेका थिए। तर बिलमा प्रिमियम रकम छुटेको दाबी गर्दै विद्युत् प्राधिकरणले छुट बिलको पत्र काटेपछि विवाद बढेको थियो।

विवाद बढेपछि प्रधानमन्त्री पुष्पकमल दाहाल प्रचण्डले उद्योगको विद्युत् लाइन काट्न भनेका थिए।

प्रधानमन्त्रीको निर्देशनअनुसार अघि बढेको प्राधिकरण उनकै निर्देशनमा रोकिएको छ। अहिले आयोग बनाइएको छ भने काटिएका उद्योगको बिजुली पनि जोडिएको छ।