काठमाडौं १२ माघ । राष्ट्रिय स्वतन्त्र पार्टीका सभापति समेत रहेका सांसद रवि लामिछानेविरुद्ध सहकारी ठगीको आरोपमा राज्यव्यवस्था समितिमा उजुरी परेको छ । प्रतिनिधिसभाअन्तर्गत रहेको उक्त समितिमा रवि आफैँ सदस्य छन् ।

रविविरुद्ध परेको उजुरी के हुँदै छ भन्ने प्रश्नमा समिति सभापति रामहरि खतिवडाले उजुरी परे पनि प्रकृया अघि नबढेको बताए । शुक्रबार बाह्रखरीसँग संक्षिप्त कुराकानी गर्दै सभापति खतिवडाले ‘विस्तृत छानबिन नभएसम्म हचुवाको भरमा’ समितिले विषय अघि नबढाउने बताए ।

“रविजीविरुद्ध उजुरी समितिमा परेको छ । त्योभन्दा बाहेक अरु कुरा अघि बढेको छैन,” सभापति खतिवडाले भने, “सहकारी सम्बन्धी ठगी मुद्दाको कुरा छ । यसमा विस्तृत छानबिन हुनुपर्छ । उहाँको कति संलग्नता छ अथवा छैन विस्तृत सबै डकुमेन्ट नभइकन अहिले हचुवाको भरमा छलफल गराइहाल्ने पक्षमा हामी छनौं ।”

सभापति लामिछानेले पहिले सबै कुरा बुझ्ने र त्यसपछि मात्र समिति सदस्य लामिछानेविरुद्ध परेको उजुरी छलफलका लागि अघि बढाउने बताए । लामिछानेविरुद्ध सिन्धुलीका युवराज सफलले माघ ९ गते मंगलबार उजुरी दर्ता गराएका हुन् । उजुरीकर्ता सफलले सहकारी घोटला प्रकरणमा संलग्नता भएको आरोप लगाएका छन् । सञ्चारमाध्यममा आएको समाचारलाई आधार मानेर सफलले उजुरी दर्ता गराएको उल्लेख गरेका छन् ।

उनले, रविविरुद्धको उजुरी सभामुख देवराज घिमिरेसमक्ष पनि दर्ता गराएका छन् ।