काठमाडौं १४ माघ । स्पेनिस ला लिगाअन्तर्गत आठ गोल भएको रोमाञ्चक खेलमा साविक विजेता बार्सिलोना भियारियालसँग ५–३ को हार बेहोरेको छ ।

शनिबार राति स्टाडियो ओलिम्पिक लुइस कम्पनीज रंगशालामा सम्पन्न खेलमा घरेलु टिमले कुनै समय ३–२ को अग्रता बनाए पनि जोगाउन सकेन ।

खेलको ४१औँ मिनेटमा जेरार्ड मोरेनोले गोल गर्दै पाहुना टिम भियारियाललाई अग्रतामा राखेका थिए । ५४औँ मिनेटमा इलियस अकोखाकले गोल गर्दै भियारियालको अग्रता दोब्बर बनाए । ६०औँ मिनेटमा बार्सिलोनाका इल्काइ गुन्डोगानले गोल गर्दै भियारियालको अग्रतालाई ३–२ मा झारेका थिए । त्यसको आठ मिनेटपछि पेड्रीले गोल गर्दै घरेलु टिमलाई खेलमा फर्काए ।

७१औँ मिनेटमा भियारियका एरिक बाइलीबाट आत्मघाति गोल पाएपछि बार्सिलोनाले ३–२ को अग्रता बनाएको थियो । तर, ८४औँ मिनेटमा गोन्कालो गुडेसले गोल गर्दै पुनः भियारियाललाई खेलमा फर्काए । यस्तै, इन्जुरी समयमा एलेसान्डर सोर्लोथ र लुइस मोरालेसले गोल गर्दै भियारियाललाई ५–३ को जित दिलाए ।

जारी सिजन ला लिगामा बार्सिलोनाको यो तेस्रो हार हो । तालिकाको तेस्रो स्थानमा रहेको बार्सिलोनाले २१ खेल खेल्दा ४४ अंक जोडेको छ । जुन शीर्ष स्थानको रियाल मड्रिडभन्दा १० अंक कम हो । समान खेलबाट ५४ अंकसहित रियाल शीर्ष स्थानमा छ ।

जितसँगै २२ खेलबाट २३ अंक जोडेको भियारियाल तालिकाको १४औं स्थानमा उक्लिएको छ ।