काठमाडौैं ६ फागुन । प्रहरी प्रधान कार्यालयले महानगरीय प्रहरी वृत्त दरबारमार्गको इन्चार्जमा डिएसपी दान बहादुर मल्ललाई सरुवा गरेको छ। उनी माओवादी केन्द्रका अध्यक्ष पुष्पकमल दाहाल ‘प्रचण्ड’का पिएसओका रुपमा काम गर्दै आएका थिए।

दरबारमार्ग वृत्तका डिएसपी तिलक भारतीलाई हटाएपछि वृत्तको इन्चार्ज रिक्त हुँदै आएको थियो। सामूहिक बलात्कार घटनामा मिलापत्र गराउँदा डिएसपी भारतीको समेत शकास्पद भूमिका रहेको छानबिन समितिको प्रतिवेदनका आधारमा उनलाई हटाइएको हो।
माघ ७ गते कमलादीको ल्याण्डमार्क होटल एण्ड अर्पाटमेन्टमा एक युवतीमाथि सामूहिक बलात्कार भएको थियो। जून घटनामा युवतीले प्रहरीमा उजुरी गरेकोमा प्रहरीकै सहयोगमा पछि मिलापत्र गराइएको थियो। घटना बाहिर आएपछि प्रहरीले वृत्तका इन्सपेक्टर लक्ष्मणसिंह ठकुरी र सई चन्द्र भण्डारी निलम्बनमा परीसकेका छन्।

हटाइएका डिएसपी भारती पनि माओवादी नेताहरुकै सिफारीसमा दरबारमार्गमा सरुवा भएका थिए।
दरबारमार्ग वृत्त डिएसपीहरुको पहिलो रोजाईमा पर्ने गर्दछ। जहाँ क्षमताको आधारमा भन्दा पनि ठुला नेताहरुको सिफारीसमा पर्ने डिएसपीहरुको मात्र सरुवा भएको छ। यसपटक पनि त्यस्तै भएको छ।

नेताहरुको सिफारीसमा सरुवा हुनेहरुले शान्ति सुरक्षामा भन्दा कमाउनमा केन्द्रीत हुने भएकाले समस्या आउने गरेको छ।