काठमाडौं, १५ फागुन । बाराको निजगढमा शंकास्पद वस्तु विस्फोटमा ३ जनाको मृत्यु भएको घटना अनुसन्धानको लागि प्रहरीले दुई जनालाई पक्राउ गरेको छ।पक्राउ पर्नेमा एक नेपाली र एक भारतीय नागरिक रहेका जिल्ला प्रहरी कार्यालय बाराका प्रहरी उपरीक्षक एसपी सुरेश काफ्लेले जानकारी दिए।

‘पक्राउ पर्नेमा निजगढ नगरपालिका ९ का २९ वर्षीय टीकाराम पाख्रिन र भारतको मोतिहारी घर भएका ४० वर्षीय रमेश जैसवाल छन्,’ एसपी काफ्लेले ग भने, ‘विस्फोटमा परेर अहिलेसम्म ३ जनाको मृत्यु भइसकेको छ। एक घाइतेको अवस्था गम्भीर छ।’पक्राउ पर्ने पाख्रिन कबाडी सामान बेच्ने व्यक्ति हुन्।

जैसवाल कबाडी सामान किन्ने व्यवसायी भएका प्रहरीले जनाएको छ। जैसवालले निजगढमै कबाडी गोदाम सञ्चालन गर्दै आएका छन्। विस्फोटमा ठूलो मानवीय क्षति भएपछि जैसवाल कबाडी गोदामबाट एम्बुलेन्स चढेर भारतीर भाग्दै गरेको अवस्थामा पक्राउ परेका एसपी काफ्लेले बताए। ‘विस्फोटपछि उनी पत्नी र छोराछोरीसहित एम्बुलेन्स चढेर भारततिर भाग्दै थिए,’ एसपी काफ्लेले भने, ‘हामीले अनुसन्धानको लागि उनलाई पक्राउ गरेर हिरासतमा राखेका छौँ।’

विस्फोट भएको वस्तु के हो अझै खुल्न बाँकी रहेको उनले बताए।